آغا خان تعلیمی بورڈ نے میٹرک کے نتائج کا اعلان کردیا

دوسری پوزیشن لینے والی ملیحہ، تیسری پوزیشن پانیوالی کنزہ اور پہلی پوزیشن حاصل کرنیوالی ہبہ خالد۔ فوٹو: فائل

---

آغا خان تعلیمی بورڈ نے میٹرک ( نویں اوردسویں جماعتوں) کے سالانہ امتحانات کے نتائج جاری کردیے ہیں۔

بورڈ کی جانب سے جاری کیے گئے نتائج کے مطابق گزشتہ سال کی طرزپر میٹرک کے امتحانات میں ایک بار پھرابتدائی تینوں پوزیشنزطالبات نے حاصل کیں جبکہ 3 میں سے 2پوزیشنزکراچی کے اسکولوں کے پاس رہیں ابتدائی تینوں پوزیشنز کی حامل طالبات نے 90 فیصد سے زائد مارکس حاصل کیے امتحانات میں پی ای سی ایچ ایس گرلز اسکول کراچی کی طالبہ ہبہ خالد نے 1050 میں سے 987مارکس لے کر94 فیصد نمبروں کے ساتھ پہلی پوزیشن حاصل کی۔

نصرت جہاں اکیڈمی گرلز ہائی اسکول چناب نگرپنجاب کی طالبہ ملیحہ احمد نے 970مارکس لے کر92.38 فیصد نمبروں کے ساتھ دوسری پوزیشن جبکہ المرتضیٰ اسکول کراچی کی سیدہ کنزہ کاظمی نے 969 مارکس لے کر92.28 فیصد نمبروں کے ساتھ تیسری پوزیشن حاصل کی ،آغاخان تعلیمی بورڈ کے اعلامیے کے مطابق نویں اوردسویں کے امتحانی نتائج 7 ہفتوں میں جاری کیے گئے، نویں اوردسویں کے43 مضامین کے امتحانات کراچی سے گلگت ، میانوالی ،سکھر اور جیکب آباد سمیت ملک کے 22 مختلف شہروں میں منعقد ہوئے تھے۔

دسویں جماعت کے نتائج کا مجموعی تناسب 61.6فیصد رہاجس میں 20فیصد طلبا نے اے ون گریڈ حاصل کیاجبکہ نویں جماعت کے نتائج کامجموعی تناسب 83.6فیصد رہااور15.6فیصد طلبا نے اے ون گریڈ حاصل کیانتائج کے اجرا کے موقع پرجاری اعلامیے کے مطابق آغاخان تعلیمی بورڈ کی ایسوسی ایٹ ڈائریکٹر کریمہ کارا نے اس موقع پر تعلیمی معیار میں بہتری کے لیے موثر تدریس کی اہمیت پر زور دیتے ہوئے کہا کہ'نویں دسویں کے امتحانات میں طلبا کی بڑی تعداد کو بہترین گریڈز حاصل کرتے ہوئے دیکھ کر نہایت خوشی محسوس ہو رہی ہے ہم نہ صرف طلبا کو ان کی بہترین کارکردگی پر مبارکباد دیتے ہیں، ان کے اساتذہ کی محنت کو بھی سراہتے ہیں جنھوں نے درست انداز میں علم کے حصول کے لیے طلبا کی رہنمائی کی۔

اس موقع پر پی ای سی ایچ ایس گرلزاسکول کراچی کی پرنسپل سیما ملک نے آغاخان تعلیمی بورڈ کے شفاف نظام پر بھرپور اعتماد کا اظہار کیا، انھوں نے کہا کہ ہمیں اپنی چند طالبات سے کافی توقعات تھیں اور ان میں سے ایک نے اول پوزیشن حاصل کرلی، ہمیں ہبہ پر بے حد فخر ہے، ہبہ کی کامیابی باہمی محنت، ایمانداری ، معیاری تعلیم اور موزوں راہنمائی کا نتیجہ ہے۔

ہبہ خالد نے اس موقع پر کہا کہ میں اپنی کامیابی اپنے والدین ، اساتذہ اور بہن بھائیوں کے نام کرتی ہوںجنھوں نے ہر مرحلے پر میری مدد کی اور اپنے پروردگار کا شکر ادا کرتی ہوں میرے اساتذہ نے توجہ مرکوز کرنے، تصورات کے بہتر فہم کے حصول کے لیے حوالہ جاتی کتب پڑھنے اور آغاخان تعلیمی بورڈکی طرف سے فراہم کردہ اسٹوڈنٹ لرننگ آؤٹ کمز پر عبور حاصل کرنے کا مشورہ دیا، دوسری اور تیسری پوزیشن حاصل کرنے والی طالبات ملیحہ احمد اور سیدہ کنزہ کاظمی نے کامیابی کے حصول کے لیے تصورات کے فہم پر مبنی تعلیم کی اہمیت پر زور دیا ، ملیحہ احمد نے کہا امتحان میں بہترین کارکردگی کا مظاہر ہ کرنے کا سادہ ترین طریقہ یہ ہے کہ اپنے علم میں اضافہ کیا جائے ۔