آپریشن ضرب عضب زمینی کارروائی تیز دہشت گردوں کے اہم تربیتی مراکز زد میں

میرعلی میں تربیت گاہوں کیخلاف کارروائی شروع، بویا ، محمد خیل ، دیگان اور خرکمر میں فوجی دستے آگے بڑھ رہے ہیں فوٹو: آن لائن/فائل

---

شمالی وزیرستان میں آپریشن ضرب عضب کے دوران سیکیورٹی فورسز نے میرعلی اور دتہ خیل میں زمینی کارروائی تیز کر دی، دہشتگردوں کے اہم تربیتی اور منصوبہ بندی مراکز آپریشن کی زد میں آگئے۔

نجی ٹی وی کے مطابق میرعلی کے علاقوں خیسوراور خوشخالی میں دہشتگردوں کی اہم تربیت گاہوں کے خلاف کارروائی کا آغاز کردیا گیا ہے۔ بویا ، محمد خیل ، دیگان اور خرکمر میں فوجی دستے آگے بڑھ رہے ہیں ، پندرہ جون سے جاری فضائی کارروائی میں اہم ٹھکانے تباہ اور ساڑھے چار سو سے زائد ملکی اورغیرملکی دہشتگرد مارے گئے جبکہ وطن کی راہ میں 22 اہلکاروں نے اپنی جانوں کے نذرانے پیش کیے۔ ادھر نقل مکانی کرنے والے9 لاکھ55 ہزار996 افراد کا اندراج کرلیا گیا، فاٹا ڈیزاسٹر مینجمنٹ اتھارٹی کے ترجمان کے مطابق اب تک آئی ڈی پیز میں 40 کروڑ روپے کے لگ بھگ نقد امداد تقسیم کی جا چکی ہے جبکہ عالمی ادارہ خوراک نے اب تک مجموعی طور پر3726 میٹرک ٹن خوراک تقسیم کی ہے۔