سوئیڈش اوپن ٹینس ٹرافی پر الیجاندرو نے قبضہ جمالیا

فائنل میں مناکو کو مات،باکو ویمنز کپ کے فائنل میں الینا سویٹولینا نے بوجانا کو زیر کرلیا،پینگ شوئی کی بھی ٹائٹل فتح۔ فوٹو: اے ایف پی

---

GILGIT: سوئیڈش اوپن ٹینس کی ٹرافی پر اسپین کے پبلو الیجاندرو نے قبضہ جمالیا، انھوں نے فائنل میں ارجنٹائن کے جوآن مناکو کیخلاف6-3 اور7-5 سے فتح پائی۔

باکو ویمنز کپ کے فائنل میں یوکرینی پلیئر الینا سویٹولینا نے سربیا کی بوجانا جوانوسکی کو 6-1 ، 7-6 (7/2) سے زیرکرلیا، وہ مسلسل دوسری مرتبہ ٹرافی اپنے نام کرنے میں کامیاب رہیں، نان چینگ ویمنز ٹینس کے فائنل میںٹاپ سیڈ میزبان چینی اسٹار پینگ شوئی نے ہموطن لیو فینگ ژو کو 6-2 ، 3-6 اور6-3 سے ہرادیا، کروشیا کے شہر اومیگ میں جاری اے ٹی پی ٹورنامنٹ کے سیمی فائنلز میں یوروگوئے کے پبلو کیواس نے ٹاپ سیڈ اطالوی پلیئر فابیو فوگنینی کو 6-3 اور6-4 سے مات دے دی۔

تھرڈ سیڈ مارن کلک کو اسپین کے سیکنڈ سیڈ ٹومی روبریڈو نے 7-6(10/8) اور6-3 سے زیر کرلیا، اٹلانٹا اوپن ٹینس میں جون اسنر اعزاز کے دفاع سے ایک فتح کی دوری پر پہنچ گئے، فیصلہ کن معرکے میں ان کا سامنا ڈوڈی سیلا سے ہوگا، سیمی فائنل میں جیک سوک اور بینجمن بیکر کو شکست ہوگئی،5 لاکھ 68 ہزار امریکی ڈالر انعامی مالیت کے اٹلانٹا مینز ٹینس کے پہلے سیمی فائنل میں امریکا کے دفاعی چیمپئن جون اسنر نے ہموطن جیک سوک کو 7-5 اور6-4 سے مات دے دی، اسرائیلی پلیئر ڈوڈی سیلا نے جرمن حریف بینجمن بیکر کو 6-3 ، 3-6 اور6-3 سے قابو کرلیا۔

اسنر نے گذشتہ پانچ برس میں چوتھی مرتبہ اٹلانٹا اوپن کے فائنل میں جگہ بنائی، وہ 2011 اور2012 میں یہاں رنر اپ رہے جبکہ گذشتہ برس جنوبی افریقی پلیئر کیون اینڈرسن کو مات دیکر چیمپئن بننے کا اعزاز پایا تھا، عالمی درجہ بندی میں 12ویں پوزیشن پر فائز اسنر نے ہر سیٹ میں ایک ایک مرتبہ سوک کی سروس بریک کی، اس کامیابی کے ساتھ ہی اسنر نے سوک کے ہاتھوں2 ہفتے قبل نیوپورٹ اوپن میں ملنے والی ناکامی کا حساب بھی چکتا کردیا، باہمی مقابلوں میں اب اسنر کو سوک پر 4-1 سے برتری مل گئی ہے۔

کامیابی کے بعد میڈیا سے گفتگو کرتے ہوئے اسنر نے کہا کہ شدید گرمی اور حبس زدہ موسم میں کھیلنا آسان نہیں تھا لیکن میں جیت کا عزم لے کر کورٹ میں اترا، سوک بھی اچھا پلیئر ہے، دوسری جانب ڈوڈی سیلا دوسری مرتبہ اے ٹی پی ایونٹ کے فائنل میں پہنچے، انھوں نے اس سفر کے دوران 4 سیڈ ویساک پوسپیسل اور 9 سیڈ امریکی کھلاڑی سام کیورے کو ٹھکانے لگایا، بینجمن بیکر سے تین باہمی مقابلوں میںسیلا کی یہ پہلی فتح ہے، وہ اس سے قبل 2008 کے بیجنگ ایونٹ کا فائنل کھیلے تھے جس میں انھیں امریکی پلیئر اینڈی روڈک نے ہرا دیا تھا۔