پاکستان کرکٹ ٹیم کا 15 رکنی پہلا حصہ دورہ بنگلا دیش کے لیے روانہ ہوگیا۔
قومی اسکواڈ کا پہلا دستہ کراچی سے دبئی کے راستے ڈھاکا روانہ ہوا۔کپتان سلمان علی آغا کی قیادت میں صائم ایوب، فخر زمان، محمد نواز، ابرار احمد، خوشدل شاہ، فہیم اشرف اور سپورٹ اسٹاف اپنی منزل کی جانب روانہ ہوئے جبکہ دوسرا گروپ بدھ کی صبح کراچی سے روانہ ہوگا۔
15 رکنی پاکستان اسکواڈ میں سلمان علی آغا ( کپتان)،ابرار احمد، احمد دانیال، فہیم اشرف، فخر زمان، حسن نواز،حسین طلعت، خوشدل شاہ، محمد عباس آفریدی، محمد حارث (وکٹ کیپر)، محمد نواز ،صاحبزادہ فرحان (وکٹ کیپر)، صائم ایوب، سلمان مرزا اور سفیان مقیم شامل ہیں۔
ہیڈ کوچ مائیک ہیسن ہیڈ کوچ،شین میکر موٹ فیلڈنگ اورگرانٹ لوڈین اسٹرینتھ اینڈ کنڈیشنگ کوچ اور نوید چیمہ منیجر کی زمہ داری ادا کریں گے۔
دورہ بنگلادیش میں تین ٹی ٹوئنٹی انٹرنیشنل میچز 20، 22 اور 24 جولائی کو شیر بنگلا اسٹیڈیم ڈھاکا میں کھیلے جائیں گے۔
دورہ بنگلادیش کے بعد پاکستان ٹیم امریکا کے لیے روانہ ہوگی۔ پاکستان اور ویسٹ انڈیز کے درمیان 3 میچز پرمشتمل ٹی 20 سیریز فلوریڈا میں یکم تا 4 اگست کھیلی جائےگی۔دونوں ممالک کے درمیان ون ڈے سیریز8 سے 12 اگست تک ٹرینیڈاڈ اینڈ ٹوباگو میں طے ہے۔
