ایران نے ایک بار پھر اسرائیل اور امریکا کو خبردار کیا ہے کہ بوشہر کے جوہری پلانٹ کو نشانہ بنانے کے سنگین نتائج نکلیں گے۔
عالمی خبر رساں ادارے کے مطابق ایران کے وزیر خارجہ سید عباس عراقچی نے مغربی ممالک پر دوہرے معیار کا الزام عائد کرتے ہوئے کہا کہ یوکرین کے جوہری پلانٹ کے معاملے پر شدید ردعمل دینے والے ممالک ایران کی جوہری تنصیبات پر حملوں پر خاموش ہیں۔
سماجی رابطے کی ویب سائٹ پر اپنے بیان میں انھوں نے مزید کہا کہ یوکرین کے زاپوریژیا جوہری بجلی گھر کے قریب جھڑپوں پر مغربی دنیا نے سخت ردعمل ظاہر کیا تھا لیکن ایران کے بوشہر جوہری بجلی گھر پر مبینہ حملوں کے باوجود کوئی مؤثر آواز نہیں اٹھائی گئی۔
عباس عراقچی کا مزید کہنا تھا کہ اسرائیل اور امریکا نے بوشہر پلانٹ کو متعدد بار نشانہ بنایا ہے تاہم عالمی سطح پر اس پر وہ توجہ نہیں دی گئی جو یوکرین کے معاملے میں دیکھی گئی تھی۔
ایرانی وزیر خارجہ نے خبردار کیا کہ اگر کسی جوہری تنصیب کو نقصان پہنچا تو اس کے نتیجے میں پیدا ہونے والی تابکاری کے اثرات صرف تہران تک محدود نہیں رہیں گے بلکہ خلیجی تعاون کونسل کے دارالحکومتوں میں بھی زندگی کا خاتمہ ہوجائے گا۔
انھوں نے مزید کہا کہ ایران کی پیٹروکیمیکل تنصیبات کو نشانہ بنانا اس بات کی نشاندہی کرتا ہے کہ مخالفین کے اصل مقاصد کیا ہیں۔
یاد رہے کہ زاپوریژیا جوہری بجلی گھر یورپ کا سب سے بڑا جوہری پلانٹ ہے اور روس یوکرین جنگ کے دوران اس کے گرد ہونے والی کشیدگی پر عالمی برادری کی جانب سے مسلسل تشویش کا اظہار کیا جاتا رہا ہے۔
