اسلام آباد:
حکومت کی جانب سے آئندہ مالی سال 2026-27 کے وفاقی بجٹ میں مقامی طور پر تیار ہونے والی گاڑیوں کے خام مال پر ٹیکسز میں کمی کا امکان ہے۔
اس سلسلے میں مقامی طور پر تیار گاڑیوں کے لیے نیشنل ایوریج ٹیرف 6 فیصد سے کم رکھنے کی تجویز دی گئی ہے۔
ذرائع کے مطابق یکم جولائی سے نئے بجٹ اور نئی آٹو پالیسی میں مقامی آٹو انڈسٹری کے فروغ کے لیے تجاویز پیش کی گئی ہیں ۔ الیکٹرک وہیکل پالیسی کا دائرہ تمام نیو انرجی وہیکلز تک بڑھانے کی تجویز ہے۔
اسی طرح ای وی، پلگ اِن ہائبرڈ اور فیول سیل وہیکلز کو بھی رعایتی ٹیرف میں شامل کرنے کی تجویز دی گئی ہے۔اس کے علاوہ نیشنل ٹیرف پالیسی کے تحت اضافی کسٹمز ڈیوٹی ختم اور ریگولیٹری ڈیوٹی میں کمی کی تجویز بھی ہے۔
مقامی اسمبل ای وی گاڑیوں کو درآمدی اور مکمل تیار گاڑیوں پر ترجیحی تحفظ دینے کی تجویز پر بھی غور کیا جا رہا ہے۔
ذرائع کا کہنا ہے کہ مقامی طور پر تیار گاڑیوں کے لیے نیشنل ایوریج ٹیرف 6 فیصد سے کم رکھنے کی تجویز ہے جب کہ سی کے ڈی پارٹس پر مجوزہ رعایتی کسٹمز ڈیوٹی 30 جون 2028 تک نافذ رکھنے کی تجویز پیش کی گئی ہے۔
حکومت کی جانب سے آٹو سیکٹر مراعات کو مرحلہ وار نارمل ریجیم میں منتقل کرنے کی تجویز بھی دی گئی ہے۔
