کراچی حصص مارکیٹ مندی کا شکار39 پوائنٹس کمی

کاروباری حجم پیر کی نسبت 13.04 فیصد کم رہا اور مجموعی طور پر21 کروڑ89 لاکھ 8 ہزار 620 حصص کے سودے ہوئے۔

Business Reporter October 15, 2014

انڈیکس 30355 پر آ گیا، 7 ارب روپے کا نقصان، 21 کروڑ 89 لاکھ حصص کے سودے فوٹو: آن لائن /فائل

غیرملکیوں کی فروخت بڑھنے، اوجی ڈی سی ایل کے حصص کی لندن اسٹاک مارکیٹ میں فروخت کیخلاف پٹیشن دائر ہونے کی اطلاعات اور پرافٹ ٹیکنگ کے باعث کراچی اسٹاک ایکس چینج میں منگل کو ایک بارپھر کاروباری صورتحال اتار چڑھاؤ کے بعد مندی کے زیر اثررہی جس کے نتیجے میں 50.72 فیصد حصص کی قیمتیں گر گئیں جبکہ سرمایہ کاروں کے8 ارب96 کروڑ74 لاکھ 68 ہزار 478 روپے ڈوب گئے۔

ماہرین اسٹاک کا کہنا تھا کہ بنیادی طور پر منافع کے حصول پر دباؤ بڑھنے سے مارکیٹ مندی سے دوچار ہوئی، ٹریڈنگ کے دوران میوچل فنڈز کی جانب سے45 کالاکھ85 ہزار842 ڈالر، این بی ایف سیز کی جانب سے4 لاکھ13 ہزار16 ڈالر اور انفرادی سرمایہ کاروں کی جانب سے8 لاکھ12 ہزار 307 ڈالر مالیت کی تازہ سرمایہ کاری کے نتیجے میں ایک موقع پر 124 پوائنٹس کی تیزی سے انڈیکس کی 30500 پوائنٹس کی نفسیاتی حد بھی بحال ہوگئی تھی لیکن اس دوران غیرملکیوں، مقامی کمپنیوں، بینکوں ومالیاتی اداروں اور دیگر آرگنائزیشنز کی جانب سے مجموعی طور پر 58 لاکھ 11 ہزار165 ڈالر مالیت کے سرمائے کے انخلا نے تیزی کے اثرات زائل کر دیے جس کے نتیجے مارکیٹ مندی سے دوچار ہوئی اور کاروبار کے اختتام پر کے ایس ای 100 انڈیکس 39.19 پوائنٹس کی کمی سے 30355.22 ہوگیا جبکہ کے ایس ای30 انڈیکس 88.46 پوائنٹس کی کمی سے 20421.45 اور کے ایم آئی 30 انڈیکس48.77 پوائنٹس کی کمی سے 49076.64 ہوگیا۔

کاروباری حجم پیر کی نسبت 13.04 فیصد کم رہا اور مجموعی طور پر21 کروڑ89 لاکھ 8 ہزار 620 حصص کے سودے ہوئے جبکہ کاروباری سرگرمیوں کا دائرہ کار414 کمپنیوں کے حصص تک محدود رہا جن میں 210 کے بھاؤ میں اضافہ، 181 کے داموں میں کمی اور 23 کی قیمتوں میں استحکام رہا۔