آم کا ایک لاکھ 75 ہزار ٹن کا برآمدی ہدف حاصل نہ ہوسکا

آم کی برآمد کے لیے مقرر کردہ ہدف سیلاب اور سیاسی عدم استحکام کے باعث پیدا ہونے والی صورتحال کی وجہ سے حاصل نہ ہوسکا۔

Business Reporter October 20, 2014

آم کے سیزن کے دوران رمضان کی آمد کے سبب اسلامی ملکوں میں پاکستانی آم کی کھپت زائد رہی۔ فوٹو: فائل

KARACHI: پاکستان سے رواں سال ایک لاکھ 75 ہزار ٹن آم کی برآمد کا ہدف حاصل نہ ہوسکا۔ آم کی مجموعی برآمدات ڈیڑھ لاکھ ٹن سے کم رہیں۔

انڈسٹری ذرائع کے مطابق رواں سال آم کی برآمد کے لیے مقرر کردہ ہدف سیلاب اور سیاسی عدم استحکام کے باعث پیدا ہونے والی صورتحال کی وجہ سے حاصل نہ ہوسکا۔ یورپی یونین کی جانب سے پاکستانی آم کے معیار کے لیے کڑی شرائط اور قرنطینہ اصولوں پر عمل درآمد کے لیے پاکستانی پلانٹ پروٹیکشن ڈپارٹمنٹ کے سخت پراسیجر کی وجہ سے یورپی یونین کو بھی محدود پیمانے پر آم برآمد کیا گیا۔

پاکستان سے 60فیصد سے زائد آم خلیجی ریاستوں اور مڈل ایسٹ ممالک کو ایکسپورٹ کیا گیا۔ آم کے سیزن کے دوران رمضان کی آمد کے سبب اسلامی ملکوں میں پاکستانی آم کی کھپت زائد رہی۔ ذرائع نے بتایا کہ پاکستانی قرنطینہ حکام نے 90 ہزار500 ٹن سے زائد کے فائٹو سینٹری سرٹیفکیٹ جاری کیے جو گزشتہ سال کے مقابلے میں 10ہزار ٹن تک زائد رہے۔

پاکستان سے وافر مقدار میں آم افغانستان کے راستے ایران اور سینٹرل ایشیائی ریاستوں کو ایکسپورٹ کیا گیا جس کے لیے فائیٹو سینٹری سرٹیفکیٹ حاصل نہیں کیے گئے۔ اس سال سیلاب کے باعث آم کی لیٹ ورائٹیز کو نقصان پہنچا جبکہ اسلام آباد میں دھرنوں کے آغاز پر پنجاب سے سندھ تک ٹرانسپورٹ کی آمدورفت میں کمی اور کنٹینرز کی پکڑدھکڑ سے بھی آم کی ایکسپورٹ متاثر ہوئی۔