آسٹریلیا نے پاکستانی ٹیکسٹائل کیلیے ٹیرف رعایتوں کا اعلان کردیا

پاکستان کی مدد کے لیے ٹیرف اسٹرکچر میں تبدیلی کرینگے، آئندہ سال سے ٹیکسٹائل پر ڈیوٹیوں کو بڑی حد تک کم کیا جائیگا

Business Reporter November 12, 2014

تجارت متوازن بنانے میں مدد ملے گی، ہائی کمشنر، نوجوانوں کو تربیت فراہم کرنا چاہتے ہیں، ٹریڈ کمشنر، پاکستان آسٹریلیا بزنس فورم کے چوتھے سالانہ عشائیے سے خطاب۔ فوٹو: پی آئی ڈی/فائل

آسٹریلیا نے پاکستانی ٹیکسٹائل کیلیے ٹیرف رعایتوں کا اعلان کردیا ہے۔ پاکستان میں آسٹریلوی ہائی کمشنر پیٹر ہیورڈ نے پاکستان آسٹریلیا بزنس فورم کے چوتھے سالانہ عشائیے سے خطاب کرتے ہوئے کہا کہ آسٹریلیا پاکستان کی مدد کیلیے اپنے ٹیرف اسٹرکچر میں تبدیلی کریگا۔

آسٹریلیا آئندہ سال سے پاکستان سے درآمد ہونیوالی ٹیکسٹائل پر عائد ڈیوٹیوں کو بڑی حد تک کم کرے گا، زیادہ سے زیادہ ٹیرف کی حد 5 فیصد رکھی جائے گی، اس اقدام سے پاکستان اور آسٹریلیا کے درمیان تجارتی توازن کو بھی بہتر بنانے میں مدد ملے گی جو اس وقت آسٹریلیا کے حق میں ہے۔

انہوں نے کہا کہ یہ فورم پاکستان اور آسٹریلیا کے درمیان تجارتی تعلقات کو مستحکم بنانے میں کلیدی کردار ادا کررہا ہے، یہ فورم پاکستان کی بڑی کاروباری برداری کی ترجمانی کرتا ہے اور آسٹریلیا میں موجود کاروباری مواقع کو بھی اجاگر کرتا ہے، یہ فورم باہمی تجارت اور سرمایہ کاری کے فروغ میں بھی کردار ادا کررہا ہے، رواں برس کے آخر اور آئندہ برس کے ابتدا میں اعلیٰ سطح کے سیاسی وفود کا بھی تبادلہ متوقع ہے۔

انہوں نے کہا کہ وہ پاکستانی کاروباری برادری پر زور دیں گے کہ آسٹریلیا میں موجود مواقع سے فائدہ اٹھائیں اور اس کے ذریعے اپنے کاروبار کو ترقی دیں، مزید برآں جن ملکوں میں کرکٹ کھیلی جاتی ہے وہاں آئی سی سی ورلڈکپ کے باعث آسٹریلیا پر توجہ مرکوز ہوگی جو پاکستان کیلیے بھی دلچسپی کا باعث ہوگی۔

اس موقع پر آسٹریلیا کے ٹریڈ کمشنر پیٹرک کیئرنس نے کہا کہ آسٹریلوی کمپنیاں پاکستانی نوجوانوں کو تربیت فراہم کرنا چاہتی ہیں، اس کے ذریعے پاکستانی نہ صرف اپنے مستقبل کو روشن کرسکتے ہیں بلکہ بے روزگاری کو بھی کم کرنے میں مدد ملے گی، آسٹریلوی کمپنیاں پاکستان کو باہمی تجارت، تعلیم، زراعت، لائیو اسٹاک اور توانائی کے شعبوں میں مدد کریں گی۔ انہوں نے کہا کہ خطے میں پاکستان کی منفرد اہمیت اور مواقع ہیں جبکہ دونوں ممالک کے درمیان تعلقات سے تجارت کو مزید فروغ ملے گا۔

پاکستان آسٹریلیا کے توانائی، انجینئرنگ اور لائیو اسٹاک کے شعبوں میں مہارت اور ٹیکنالوجی سے فائدہ اٹھا سکتا ہے، خصوصاً توانائی کے شعبے میں تعاون کے بہت مواقع موجود ہیں جبکہ آسٹریلوی کمپنیاں اس شعبے میں دنیا میں معروف ہیں، اسی طرح تعلیم اور تربیت میں بھی دونوں ملکوں کو فائدہ پہنچ سکتا ہے، اس وقت آسٹریلیا میں 5 لاکھ غیر ملکی طلبا وطالبات تعلیم حاصل کر رہے ہیں، ہم پاکستانی طلبا کی ہر ممکن مدد کرینگے کہ وہ آسٹریلوی جامعات میں اپنی تعلیم حاصل کرسکیں۔

قبل ازیں چیئرمین پی اے بی ایف پرویز ایچ مدراس والا نے کہا کہ اس فورم کا مقصد دونوں ملکوں کے درمیان تجارت کو فروغ دینا ہے، ہم چاہتے ہیں کہ زراعت، انجینئرنگ، الیکٹرونکس اور الیکٹریکل شعبوں سمیت ڈیری اور لائیو اسٹاک کو فروغ دیا جائے، پاکستان میں ٹیکسٹائل سمیت ان شعبوں میں بڑے مواقع موجود ہیں۔ انہوں نے کہا کہ وہ نئے ارکان کا بھی خیرمقدم کرینگے کہ وہ اس فورم سے فائدہ اٹھائیں، ہمارا فورم کاروباری برادری کی ہر ممکن مدد کرے گا اور انہیں آسٹریلیا کے کاروباری ماحول کے بارے میں بھی معلومات فراہم کریگا۔

انہوں نے بتایا کہ فورم کے 46 مستقل ارکان اور 3 ایسوسی ایٹڈ ارکان ہیں اور اس میں مزید اضافہ ہو رہا ہے۔ اس موقع پر پی اے بی ایف کے اعزازی سیکریٹری عثمان صادق، خزانچی روبینہ ہود بھائی، ریجنل بی ڈی ایم آسٹریڈ طاہر محمود، رکن ایگزیکٹو کمیٹی پی اے بی ایف بزل خان اور بڑی تعداد میں کاروباری برادری کے افراد موجود تھے۔