ممبئی حملے میں ہلاک ہونے والے امریکی واسرائیلی متاثرین کے اہل خانہ کا پاکستان سے معاوضے کا مطالبہ

حافظ سعید اور پاکستان میں مقیم دیگر دہشتگرد ذمے داران 6 کروڑ 88 لاکھ ڈالر ادا کریں، بھارتی میڈیا کی رپورٹ

INP November 12, 2014

30 اور 31 اکتوبر کو نیویارک کی عدالت میں متاثرین نے جماعت الدعوۃ، لشکر طیبہ کیخلاف دلائل دیے۔ فوٹو: فائل

بھارتی میڈیا نے دعویٰ کیا ہے کہ 2008 کے ممبئی حملوں کے امریکی اوراسرائیلی متاثرین نے جماعت الدعوۃ کے سربراہ حافظ سعید سمیت پاکستان میں مقیم دہشت گرد حملے کے ذمے داران سے 7 کروڑ 88 لاکھ ڈالر معاوضہ ادا کرنے کا مطالبہ کیا ہے۔

بھارتی میڈیا کے مطابق 30اور 31اکتوبر کو نیویارک کی عدالت میں دوبارہ پیشی سے قبل ممبئی حملوں کے9 امریکی اور اسرائیلی متاثرین نے جماعت الدعوۃ اور لشکر طیبہ کے خلاف جیوری کی طرف سے مقدمے کی سماعت اور فیصلے کے حوالے سے دلائل پیش کیے۔

26/11 ممبئی حملوں کے امریکی واسرائیلی متاثرین نے 19نومبر 2010کو کیس دائر کیا تھا جس میں پاکستانی خفیہ ایجنسی آئی ایس آئی اوراس کے سربراہ کے خلاف بھی کارروائی کا مطالبہ کیا گیا تھا لیکن امریکی محکمہ خارجہ کی طرف سے عدالت کو اس بارے میں آگاہ کرنے کے بعد کہ غیرملکی حکومت کو سفارتی استثنیٰ حاصل ہے، عدالت نے اس مطالبے کومسترد کردیا تھا۔