پھل و سبزیوں کے معیار کی بہتری کیلئے برآمد کنندگان مقامی زرعی تحقیقی اور عالمی ادارے میں معاہدہ

اسلام آباد، پھلوں وسبزیوں کے برآمد کنندگان، پاکستان زرعی تحقیقی کونسل (پی اے آرسی) اور عالمی ادارے سی اے بی آئی کے درمیان مفاہمتی یادداشت پر دستخط کیے جا رہے ہیں۔ فوٹو: آئی این پی

---

پاکستان میں ریسرچ اینڈ ڈیولپمنٹ کے ذریعے پھل اور سبزیوں کے معیار کی بہتری اور بیماریوں کے خاتمے کے لیے بین الاقوامی ادارے 'سی اے بی آئی' زرعی تحقیق کے قومی ادارے پاکستان ایگری کلچر ریسرچ کونسل (پی اے آرسی) اور پاکستان فروٹ اینڈ ویجیٹبل ایکسپورٹرز امپورٹرز اینڈ مرچنٹس ایسوسی ایشن (پی ایف وی اے) کے درمیان مفاہمتی یادداشت طے پا گئی ہے۔

اسلام آباد میں منعقدہ تقریب میں ریجنل ڈائریکٹر سی اے بی آئی ڈاکٹر بابر باجوہ، ڈی جی پی اے آرسی ساؤتھ ڈاکٹر مبارک احمد اور پی ایف وی اے کے چیئرمین آر اینڈ ڈی وحید احمد نے یادداشت پر دستخط کیے۔ وحید احمد کے مطابق سی اے بی آئی کے ساتھ حالیہ معاہدے سے پاکستان میں ہارٹی کلچر مصنوعات کے معیار کو بہتر بناتے ہوئے پھل اور سبزیوں میں پائی جانے والی بیماریوں کی روک تھام میں مدد ملے گی۔

معاہدے کے تحت بین الاقوامی مہارت اور وسیع تجربے کی حامل ادارہ سی اے بی آئی صوبائی وزارت زراعت و وفاقی وزارت نیشنل فوڈ سیکیورٹی کے ساتھ مل کر فائیٹو رسک مینجمنٹ پروگرام شروع کرے گی جس میں پی اے آرسی اور پی ایف وی اے پارٹنر ہوگی، معاہدے کی مدت 5 سال ہے جس کے تحت پاکستان میں عالمی معیار کی بائیولوجیکل لیبارٹری بھی قائم کی جائے گی جس کے لیے جگہ اور آفس پی اے آر سی فراہم کرے گی، یہ لیبارٹری سی اے بی آئی کے زیر نگرانی چلائی جائے گی جس کے لیے افرادی مہارت اور ایکویپمنٹ بھی سی اے پی آئی مہیا کرے گا۔

عالمی ادارہ پاکستان میں یوایس اے آئی ڈی کے تحت چلنے والے ریسرچ اینڈ ڈیولپمنٹ پروجیکٹس کے لیے فنڈز بھی مہیا کرے گا جن سے پاکستان میں پپیتے میں پائی جانے والی ملی بگ، ایپل مائس، کوڈنگ ماؤتھ کے خاتمے کے لیے 3 سالہ پروجیکٹ پر کام کیا جائے گا، اس پروجیکٹ میں بھی پی اے آر سی اور پی ایف وی اے کوآرڈینیٹر کا کردار ادا کریں گی، سی اے بی آئی ملی بگ کے خاتمے کے لیے پی ایف وی اے اراکین اور پی اے آر سی عملے کی صلاحیتیں بہتر اور سہولتیں بھی اپ گریڈ کرے گا۔

پی ایف وی اے رکن ایکسپورٹرز کی تربیت کے لیے ورکشاپس منعقد کی جائیں گی، اس پروگرام کے تحت پاکستان میں پھل اور سبزیوں کی بیماریوں اور کیڑوں کی روک تھام کے لیے حکمت عملی تیار کی جائے گی، پی ایف وی اے مقامی اور ایکسپورٹ مارکیٹ کو اعلیٰ معیار کی مصنوعات کی فراہمی یقینی بنانے کے لیے کوالٹی اشورنس سسٹم برائے ایس پی ایس کی تشکیل میں سی اے بی آئی، پی اے آر سی، پلانٹ پروٹیکشن ڈپارٹمنٹ کی مدد کرے گی۔