پریانکا چوپڑا اور انوشکا شرما کے بعد تاپسی پنو نے بھی فلم پر وڈکشن میں قدم رکھ دیا

بطورمعاون پروڈیوسر پہلی فلم ہی سنجے لیلا بھنسالی کے ساتھ کررہی ہوں،تاپسی۔ فوٹو : فائل

---

بالی ووڈ اداکاراؤں انوشکا شرما اور پریانکاچوپڑا کے بعد تاپسی پنو نے بھی ہیروئنوں کی پروڈکشن لیگ میں شمولیت اختیار کرلی ہے اور ایوارڈ یافتہ ہدایتکار و پروڈیوسر سنجے لیلا بھنسالی کے ساتھ مل کر ایک فلم بنانے کا فیصلہ کرلیا ہے ۔

اطلاعات کے مطابق وہ معاون پروڈیوسر کے طور پر 2011 میں ریلیز ہونے والے سپر ہٹ تامل فلم کنچنا کے ہندی ریمیک کے لیے کام کریں گی ۔

تاپسی پنو جو اپنے اس نئے شعبے کے حوالے سے بہت پرجوش ہیں کا کہنا ہے کہ میں اداکاری کے ساتھ اس نئے شعبے میں قدم رکھنے پر بہت خوش ہوں اور یہ تبدیلی میرے لیے بہت بہتر ثابت ہوگی اداکارہ کا مذید کہنا تھا کہ ابھی بہت کچھ ابتدائی مراحل میں ہے اور فلم کے سلسلہ میں کافی کچھ طے کیا جانا ہے۔

اس لیے مزید کچھ نہیں کہا جاسکتا مگر یہ طے ہے کہ میں نے پروڈکشن کے میدان میں بھی قدم رکھ دیا ہے اور پہلی ہی فلم سنجے لیلا بھنسالی کے ساتھ کررہی ہوں جو ایک بہت بڑے فلمساز اور ہدایتکار ہے ان سے مجھے بہت کچھ سیکھنے کو ملے گا ۔

تامل زبان میں پہلے ہی کنچناکا سیکوئل ''کنچنا 2'' کے نام سے بنایا جارہا ہے جس میں تاپسی مرکزی کردار نبھارہی ہیں اور اسے رواں برس ریلیز کیا جارہا ہے تاہم تاپسی کا کہنا ہے کہ وہ تام فلم کا سیکوئل نہیں بلکہ اس کا ہندی ریمیک بنانے جارہی ہیں اور اسے کنچنا کے سیکوئل سے قبل ہی سینما گھرون کی زینت بنایا جائے گا ۔واضح رہے کہ تاپسی پنو کے اکشے کمار کے ساتھ رواں برس جنوری میں فلم بے بی ریلیز ہوچکی ہے۔