سویڈن کے مینز زیلمرلو نے یوروویژن مقابلہ جیت لیا

مقابلے مین اٹلی تیسرے بلیجیم چوتھے جب کہ پہلی بار مدعو کیا جانے والا ملک آسٹریلیا پانچویں نمبر پر رہا. فوٹو: فائل

---

یورپ میں گائیکی کے مقابلے یورو ویژن میں سویڈن کے گلوکار مینز زیلمرلو فاتح قرار پائے ہیں، انہوں نے اس مقابلے میں روس کی پولینا گگارینا کو شکست دی ہے۔

آسٹریا کے شہر ویانا میں ہونیوالے اس 60 ویں یوروویژن مقابلے میں مجموعی طور پر 27 ممالک کے گلوکاروں نے حصہ لیاجو کہ اب تک کی سب سے زیادہ تعداد ہے۔مقابلے کے نتائج کے مطابق سویڈن کے مینز زیلمرلو نے 365 پوائنٹس حاصل کیے انھوں نے مقابلے کے لیے اپنی تیز دھن والے پاپ گانے ''ہیروز'' کے لیے یہ اعزاز حاصل کیا جس میں انھوں نے اختراعی اینیمیٹڈ ویڑوئلس کا بھی استعمال کیا تھا۔مقابلے میں روسی گلوکارہ پولینا گگارینا اپنے گانے اے ملین وائس پر 303 پوائنٹس کے ساتھ دوسرے نمبر پر رہیں۔

مقابلے مین اٹلی تیسرے بلیجیم چوتھے جب کہ پہلی بار مدعو کیا جانے والا ملک آسٹریلیا پانچویں نمبر پر رہا۔آسٹریا اور جرمنی صفر پوائنٹس کے ساتھ آخری مقام پر رہے اور 2003 کے بعد یہ پہلا موقع ہے جب کسی ملک کو صفر پوائنٹس ملے ہوں۔ مقابلے کے فائنل نتائج کا اعلان ہونے پر زیلمرلو اور پولینا اپنے جذبات پر قابو نہ رکھ سکیں اور کہا کہ ہم نے اپنے ملک کی نمائندگی کرنے میں دل و جان لگا دیا اور ہم دنیا بھر میں اپنے تمام مداحوں کا شکریہ ادا کرتے ہیں زیلمرلو نے ناظرین سے کہا میں بہت زیادہ خوش ہوں اور آپ تمام کا ووٹ دینے کے لیے شکر گزار ہوں۔ میں یہ کہنا چاہتا ہوں کہ ہم سب ہیروز ہیں خواہ ہم کسی کو بھی چاہیں، خواہ ہم کوئی بھی ہوں اور ہم کسی میں بھی یقین رکھتے ہوں، ہم سب ہیروز ہیں۔