گووندا کی بیٹی ٹینا اہوجا کی پہلی فلم ’’سیکنڈ ہینڈ ہسبینڈ‘‘ کا ٹریلر جاری

طلاق اور دوسری شادی کے موضوع پربنائی جانیوالی فلم میں پنجابی گلوکار گیپی گریوال اور دھرمیندر بھی اہم کرداروں میں ہیں۔ فوٹو : فائل

---

بالی ووڈ اداکار گووندا کی بیٹی ٹینا اہوجا جن کا اصل نام نرمدا ہے، کی پہلی فلم ''سیکنڈ ہینڈ ہسبینڈ'' کا پہلا ٹریلر جاری کردیا گیا۔ شادی اور طلاق کے موضع پر بنائی جانے والی کامیڈی فلم میں پنجابی گلوکار گیپی گریوال مرکزی کردار جب کہ ٹینا اہوجا ان کی ہیروئن کے کردار میں ہیں ۔

گزشتہ روز جاری کیے جانے والے ٹریلر میں گیپی گریوال اور ٹینا اہوجا کے چند ڈائیلاگ کے علاوہ دھرمیندر اور بھوجپوری اداکار روی شکن کے کرداروں کی جھلک بھی دکھائی گئی ہے۔سمیپ کانگ کی ہدایات اور گکھل برادرز انٹرٹین منٹ کی پروڈکشن میں بنائی جانے والی اس فلم میں رتی اگنی ہوتری، گیتا بسرا سنجے مشرا اور وجے راز بھی اہم کرداروں میں ہیں۔

دریں اثنا ٹینا ڈیسائی کا بالی ووڈ میں انٹری دینے کے حوالے سے کہنا ہے کہ فلم انڈسٹری مجھے وراثت میں ملی ہے۔ میرے والد ایک اچھے اداکار ہیں اور ان کی تمام فلموں میں اداکاری کی تعریف کی گئی ہے۔ اس لحاظ سے مجھ پر دبائو ہے کہ اپنے والد کا امیج قائم رکھتے ہوئے بالی ووڈ میں اپنا الگ مقام بنائوں ،اس کے لیے ان سے مدد اور رائے لیتی ہوں۔ مجھے پوری امید ہے ایک وقت ایسا آئے گا جب وہ مجھ پر فخر کریں گے۔

اپنی پہلی فلم کے متعلق گفتگو کرتے ہوئے ٹینا اہوجا کا کہنا تھا کہ ''سیکنڈ ہینڈ ہسبینڈ'' پہلی شادی کے بعد طلاق اور پھر شادی کے موضوع پربنائی گئی ہے جس میں کامیڈی کا عنصر بھرپور ہے جس کے لیے مجھ سمیت فلم کی پوری کاسٹ نے بہت محنت کی ہے۔

فلم میں میرے ساتھ پنجابی فلموں کے اداکار گیپی گریوال بھی ہیں، اس لیے اپنی اس فلم کی ریلیز کے سلسلہ میں بہت ایکسائیٹڈ ہوں۔ واضح رہے کہ سمیپ کانگ کی ہدایات اور گکھل برادرز انٹرٹین منٹ کی پروڈکشن میں بنائی جانے والی اس فلم میں رتی اگنی ہوتری، گیتا بسرا سنجے مشرا اور وجے راز بھی اہم کرداروں میں ہیں اور اسے 3 جولائی کو سینما گھروں کی زینت بنایا جارہا ہے ۔