سحری کی رونق اور دسترخوان کی زینت ۔۔۔ گرما گرم پراٹھے

جب مزیدار لچھے دار افغانی پراٹھے سحری میں کھانے کو ملیں تو گھر والوں کی طرف سے تعریف دن بھر کی بھوک اور محنت کا اثر زائل کردیتی ہے۔ فوٹو: فائل

---

BARCELONA: رمضان المبارک کا ہوا آغاز، سحر اور افطار میں سج گئے دسترخوان۔ ماہ مبارک کا چاند نظر آتے ہی سب کو سحری کی فکر ستانے لگتی ہے۔ کسی کونہاری، پائے، آلو گوشت یا انڈا پراٹھا کھانا پسند ہے تو کوئی میٹھی دہی گرم گرم پراٹھوں کے ساتھ کھانے کا شوقین ہے۔ لیکن سحری کے لئے سب کی ایک مشترکہ پسند پراٹھے ہیں۔ کیونکہ ہر کوئی اپنے روزے کو بنا کسی نقاہت اور آرام و سکون سے گزارنا چاہتا ہے جس کے لئے اولین ترجیح سحری میں ایسی غذا کا انتخاب ہے جو دن بھر جسم کو توانائی دیتی رہے، ساتھ ہی بھوک کے احساس کو بھی کم کرے اور اس ضرورت کو پورا کرنے کے لئے پراٹھا بہترین انتخاب ہے۔



فوٹو:فائل

ناشتے کے دسترخوان کو سحری کے دسترخوان میں بدلتے ہی اہل خانہ کی فرمائشیں بھی بدلنے لگتی ہے اور نا صرف صبح ناشتے میں پراٹھے کھانے والے افراد بلکہ ڈبل روٹی اور رسک کھانے والے لوگ بھی سحری میں پراٹھے ہی پسند کرتے ہیں۔ بچوں، بوڑھوں اور خواتین سب کے لئے ہی پراٹھا اہمیت کا حامل ہے۔ سحری کے پراٹھوں پرمکھن لگا کر بچوں کو کھلانے سے روزوں میں بچوں کو بھوک کا احساس نہیں ہوتا، جس سے بچے روزے میں تھکاوٹ محسوس نہیں کرتے۔ بوڑھے افراد جن کے روزے میں نقاہت اور کمزوری عبادت میں بھی دشواری کا سبب بنتی ہے دیر سے ہضم ہونے والی یہ غذا روزے میں زیادہ وقت تک توانائی فراہم کرتی ہے تو ساتھ ساتھ ہی روزے اور عبادت میں دل بھی لگا رہتا ہے۔

گھریلو خواتین اور ملازمت پر جانے والےمرد حضرات جنہیں نہ صرف روزے اور اس کے تمام تقاضوں کو پورا کرنا ہوتا ہے بلکہ اپنی پیشہ وارانہ ذمہ داریوں اور گھر کے کاموں کو بھی خوش اسلوبی سے نبھانا ہوتا ہے، اُن تمام افراد کے لئے ضروری ہے کہ سحری میں ایسا بھرپور کھانا کھایا جائے جو خوش ذائقہ ہونے کے ساتھ ساتھ ہضم بھی دیر سے ہو۔ اسی لئے گھر کی خواتین سحری میں مزے مزے کے کھانوں کے ساتھ پراٹھوں کی موجودگی کو یقینی بناتی ہیں تاکہ اہل خانہ روزے اور سحری کا پورا پورا مزہ لے سکیں۔



فوٹو: فائل

سحری میں گھر کے ہر فرد کی فرمائیشیں اپنے ذوق کے مطابق الگ الگ اور لذت سے بھر پور ہوتی ہیں، ایسے میں خاتون خانہ کا سب سے بڑا امتحان کم وقت میں ان تمام فرمائیشوں کو پورا کرنا ہوتا ہے جس کے لئے سحری کی کچھ تیاری رات تراویح کے بعد کرلینا آسان اور وقت بچانے کا ذریعہ ہے، اور اس کے لئے پراٹھوں کی آدھی تیاری رات میں کرکے رکھ لینے سے اس امتحان کا ایک حصہ مکمل ہوجاتا ہے۔ اسی آسان طریقے سے جب مزیدار لچھے دار افغانی پراٹھے سحری میں کھانے کو ملیں تو گھر والوں کی طرف سے تعریف دن بھر کی بھوک اور محنت اثر زائل کردیتی ہے۔ ایسی ہی آسان اور مزیدار افغانی لچھے دار پراٹھوں کی ترکیب پیشِ خدمت ہے، اُمید ہے گھریلو خواتین کو بہت پسند آئے گی۔

افغانی لچھے دار پراٹھے

اجزاء:

آٹا

گھی یا تیل

نمک

پانی

ترکیب :

آٹے میں نمک شامل کرکے پانی سے پراٹھوں کے لئے گوند لیں۔ سات روٹیاں بیل کر بیچ میں گھی یا تیل کی تہہ لگا کر ایک کے اوُپر ایک رکھ کر تمام روٹیوں کو ایک ساتھ رول کرلیں۔ (بچوں کے لئے گھی یا تیل کی جگہ مکھن کی تہہ بھی لگائی جا سکتی ہے) پھر سات روٹیوں اور گھی کے اس رول کو چھری کی مدد سے سات حصوں میں کاٹ لیں۔ ایک حصہ ایک پیڑھے کے برابر ہو۔ (یہ تمام کام رات کو کر کے رکھ لیں)۔ سحری میں ہر حصے کو الگ الگ بیل کرایک ایک پراٹھا بنا لیں۔ بس لیجیے مزیدار گرما گرم افغانی لچھے دار پراٹھے تیار ہیں۔ سحری میں سالن یا میٹھی دہی کے ساتھ نوش کریں اور اپنے روزے کو مزیدار بنائیں۔

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 سے 800 الفاظ پر مشتمل تحریر اپنی تصویر، مکمل نام، فون نمبر ، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس۔