کراچی حصص مارکیٹ میں تیزی کی بڑی لہر کے باعث 384پوائنٹس کا اضافہ

کاروباری حجم گزشتہ جمعہ کی نسبت 9.34 فیصد زائد رہا اور مجموعی طور پر34 کروڑ 55 لاکھ42 ہزار630 حصص کے سودے ہوئے۔ فوٹو : آئی این پی/فائل

---

کراچی اسٹاک ایکس چینج میں پیر کو نئے مالی ہفتے کے آغاز پرنچلی قیمتوں پر مخصوص شعبوں میں خریداری کے باعث اتارچڑھاؤ کے باوجود تیزی کی بڑی لہر رونما ہوئی جس سے انڈیکس کی 35200 ،35300 اور35400 پوائنٹس کی 3 حدیں بیک وقت بحال ہو گئیں۔

تیزی کے سبب 63.63 فیصد حصص کی قیمتیں بڑھ گئیں جبکہ حصص کی مالیت میں58 ارب75 کروڑ73 لاکھ7 ہزار567 روپے کا اضافہ ہوگیا، ٹریڈنگ کے دوران ایک موقع پر 101 پوائنٹس کی مندی بھی رونما ہوئی لیکن سیمنٹ، فرٹیلائزرسمیت دیگر شعبوں میں انسٹیٹیوشنز وانفرادی نوعیت کی سرمایہ کاری بڑھنے سے تیزی کے اثرات غالب ہوئے۔

کاروباری دورانیے میں غیرملکیوں، بینکوں ومالیاتی اداروں اور دیگر آرگنائزیشنز کی جانب سے مجموعی طور پر69 لاکھ52 ہزار 644 ڈالر مالیت کے سرمائے کا انخلا کیا گیا جبکہ اس دوران مقامی کمپنیوں کی جانب سے11 لاکھ97 ہزار802 ڈالر، میوچل فنڈز کی جانب سے1 لاکھ 23 ہزار200 ڈالر، این بی ایف سیز کی جانب سے1 لاکھ 84 ہزار123 ڈالراور انفرادی سرمایہ کاروں کی جانب سے62 لاکھ81 ہزار952 ڈالر مالیت کی تازہ سرمایہ کاری کی گئی۔

جس سے مارکیٹ کا مورال تیزی کی جانب گامزن ہوا، کاروبار کے اختتام پر کے ایس ای 100 انڈیکس384.33 پوائنٹس کے اضافے سے 35496.62 ہوگیا جبکہ کے ایس ای30 انڈیکس 268.82 پوائنٹس کے اضافے سے 22228.28 اور کے ایم آئی30 انڈیکس 952.20 پوائینٹس کے اضافے سے59217.89 ہوگیا، کاروباری حجم گزشتہ جمعہ کی نسبت 9.34 فیصد زائد رہا اور مجموعی طور پر34 کروڑ 55 لاکھ42 ہزار630 حصص کے سودے ہوئے جبکہ کاروباری سرگرمیوں کا دائرہ کار352 کمپنیوں کے حصص تک محدود رہا جن میں224 کے بھاؤ میں اضافہ، 111 کے داموں میں کمی اور 17 کی قیمتوں میں استحکام رہا۔