بڈھ بیر حملہ پر حملے کے باعث حصص مارکیٹ سے سرمائے کا انخلا

کاروبار 341 کمپنیوں تک محدود رہا جن میں سے79 کے بھاؤ میں اضافہ 242 کے داموں میں کمی اور20 کی قیمتوں میں استحکام رہا۔ فوٹو: آن لائن/فائل

---

RAWALPINDI/ ISLAMABAD: کراچی اسٹاک ایکس چینج کی تجارتی سرگرمیوں پر بڈھ بیرفضائیہ ایئربیس پر ہونے والی دہشت گردی براہ راست اثرانداز ہوئی جس کے نتیجے میں جمعہ کوابتدائی اوقات میں رونما ہونے والی تیزی مندی میں تبدیل ہو گئی جس سے سرمایہ کاروں کے مزید 80 ارب 97 کروڑروپے ڈوب گئے۔

ماہرین اسٹاک کا کہنا تھا کہ ایئربیس پرحملے کی خبر آتے ہی غیرملکی سرمایہ کاروں نے تیزرفتاری کے ساتھ اپنا سرمایہ نکالنا شروع کردیا جسے دیکھتے ہوئے سرمایہ کاری کے مقامی شعبوں نے بھی گھبراہٹ میں حصص کی آف لوڈنگ کی، کیپٹل مارکیٹ میں جمعہ کو بھی اسٹاک بروکرز کے خلاف نیب کی تحقیقات شروع ہونے کی خبریں زیربحث رہیں جس کی وجہ سے سرمایہ کاری کے تمام شعبوں نے محتاط طرز عمل اختیار کیا۔

کاروبار کے اختتام پر کے ایس ای 100 انڈیکس 391.12 پوائنٹس کی کمی سے 32760.95 ہوگیا جبکہ کے ایس ای30 انڈیکس 371.12 پوائنٹس کی کمی سے 19705.62 اور کے ایم آئی 30 انڈیکس 650.08 پوائنٹس کی کمی سے 54610.75 ہوگیا، کاروباری حجم 32.42 فیصد کم رہا،12 کروڑ35 لاکھ حصص کے سودے ہوئے، کاروبار 341 کمپنیوں تک محدود رہا جن میں سے79 کے بھاؤ میں اضافہ 242 کے داموں میں کمی اور20 کی قیمتوں میں استحکام رہا۔