حصص مارکیٹ مندی سے نکل آئی 119پوائنٹس کا اضافہ

کاروباری حجم پیر کی نسبت 45.34 فیصد زائد رہا اور مجموعی طور پر19 کروڑ 8 لاکھ63 ہزار790 حصص کے سودے ہوئے۔ فوٹو: آئی این پی/فائل

---

ریجنل مارکیٹس میں نچلی قیمتوں پر حصص کی خریداری بڑھنے سے تیزی اور وفاقی وزیرخزانہ کے بدھ کودورہ کے ایس ای میں کیپٹل مارکیٹ کیلیے ممکنہ مثبت اقدامات کی توقعات پرمخصوص شعبوں میں نچلی قیمتوں پر خریداری بڑھنے کے باعث کراچی اسٹاک ایکس چینج میں منگل کو ایک بار پھرتیزی رونما ہوئی۔

جس سے انڈیکس کی34000 پوائنٹس کی نفسیاتی حد بحال ہوگئی، 56 فیصد حصص کی قیمتیں بڑھ گئیں جبکہ حصص کی مالیت میں26 ارب85 کروڑ73 لاکھ31 ہزار448 روپے کا اضافہ ہوگیا۔ماہرین اسٹاک کا کہنا ہے کہ کیپٹل مارکیٹ میں اسلامک انڈیکس متعارف ہونے سے بھی مارکیٹ کی کارکردگی میں بہتری اور سرمایہ کاری کا حجم بڑھ سکے گا۔

ٹریڈنگ کے دوران ایک موقع پر224 پوائنٹس تک کی تیزی رونما ہونے سے انڈیکس کی34100 پوائنٹس کی حد بھی بحال ہوگئی تھی لیکن اس دوران غیرملکیوں، بینکوں ومالیاتی اداروں دیگر آرگنائزیشنزاور بروکرز کی جانب سے مجموعی طور پر26 لاکھ29 ہزار516 ڈالر مالیت کے سرمائے کے انخلا سے تیزی کی مذکورہ شرح میں کمی ہوئی ۔

تاہم کاروباری دورانیے میں مقامی کمپنیوں کی جانب سے2 لاکھ27 ہزار826 ڈالر، میوچل فنڈز کی9 لاکھ11 ہزار 126 ڈالر این بی ایف سیز کی 11 لاکھ31 ہزار639 ڈالر اور انفرادی سرمایہ کاروں کی جانب سے3 لاکھ58 ہزار925 ڈالر مالیت کی تازہ سرمایہ کاری نے مارکیٹ کو مثبت زون میں رکھا، کاروبار کے اختتام پر کے ایس ای 100 انڈیکس119.46 پوائنٹس کے اضافے سے34065.87 ہوگیا جبکہ کے ایس ای30 انڈیکس87.73 پوائنٹس کے اضافے سے20161.56 اور کے ایم آئی 30 انڈیکس159.08 پوائنٹس کے اضافے سے56899.00 ہوگیا۔

کاروباری حجم پیر کی نسبت 45.34 فیصد زائد رہا اور مجموعی طور پر19 کروڑ 8 لاکھ63 ہزار790 حصص کے سودے ہوئے جبکہ کاروباری سرگرمیوں کا دائرہ کار386 کمپنیوں کے حصص تک محدود رہا جن میں216 کے بھائو میں اضافہ، 148 کے داموں میں کمی اور22 کی قیمتوں میں استحکام رہا۔

جن کمپنیوں کے حصص کی قیمتوں میں نمایاں اضافہ ہواان میں نیسلے پاکستان کے بھائو 100 روپے بڑھ کر9000 روپے اور ماری پٹرولیم کے بھائو20.84 روپے بڑھ کر 469.99 روپے ہوگئے جبکہ آئسلینڈ ٹیکسٹائل کے بھائو38.96 روپے کم ہو کر 741.15 روپے اور کولگیٹ پامولیو کے بھائو25 روپے کم ہوکر1450 روپے ہوگئے۔