بھارتی اسپیشل ٹاسک فورس کا پاکستانی ایجنٹ گرفتار کرنے کا دعویٰ

محمداعزازالیاس اسلام آباد کے علاقے ترامڑی چوک عرفان آبادکا رہائشی ہے جسے دہلی جاتے ہوئےمیرٹھ کینٹ ایریا سے گرفتارکیا:فوٹو: فائل

---

بھارتی ریاست اتر پردیش میں اسپیشل ٹاسک فورس نے پاکستانی خفیہ ایجنسی کے ایجنٹ کو گرفتارکرکے اس کے قبضے سے بھارتی فوج سے متعلق حساس دستاویزات برآمد کرنے کا دعویٰ کردیا۔

بھارتی میڈیا کے مطابق آئی جی سجیت پانڈے نے دعویٰ کیا کہ اسپشل ٹاسک فورس کو اطلاع ملی تھی کہ ایک پاکستانی کو بھارتی فوج کے بارے میں معلومات جمع کرنے کے لیے بنگلہ دیش کے ذریعے مغربی اترپردیش بھیجا گیاہے۔پانڈے نے دعویٰ کیا ہے کہ دوران تفتیش ملزم نے اعتراف کیا ہے کہ 2012میں پاکستانی خفیہ ایجنسی کے ساتھ اس کا رابطہ ہوا تھا جس نے اسے بھارت بھیجنے کے لیے تربیت دی ۔اعزاز کے خلاف میرٹھ کے صدر بازار پولیس اسٹیشن میں مقدمہ درج کرکے تفتیش شروع کردی گئی ہے۔

محمد اعزاز الیاس عرف محمد کالام اسلام آباد کے علاقے ترامڑی چوک عرفان آبادکا رہائشی ہے جسے دہلی جاتے ہوئے میرٹھ کینٹ ایریا سے گرفتارکیاگیا۔ سجیت پانڈے کاکہنا تھا کہ گرفتارایجنٹ کے قبضے سے بھارتی فوج سے متعلق دستاویزات،پاکستانی شناخت کا ثبوت،مغربی بنگال کی جعلی ووٹرشناخت،ضلع بریلی کے پتے والا جعلی کارڈ،دہلی میٹروکارڈ،لیپ ٹاپ برآمد کیا گیا ہے۔