زلزلے کے مزید جھٹکے

یہ قدرتی وارننگ ہے اور قدرت کی وارننگ کو سمجھنا انسان کی بقا کے لیے انتہائی ضروری ہے۔ فوٹو: فائل

---

LAHORE: پاکستان کے مختلف علاقوں میں ہفتے کو زلزلے کے شدیدجھٹکے محسوس کیے گئے، ریکٹر اسکیل پر زلزلہ کی شدت 5.8 ریکارڈکی گئی، اسکا مرکزکوہ ہندوکش میں پاکستان ، افغانستان اور تاجکستان کے سرحدی علاقے میں تھاجب کہ اس کی گہرائی 175کلومیٹر زیر زمین تھی، امریکی جیالوجیکل سروے نے زلزلہ کی شدت 5.3 درجہ بتائی ہے۔

زلزلے کے جھٹکے لاہور، اسلام آباد، پشاور، ایبٹ آباد، مالاکنڈ، خیبرایجنسی ، شانگلہ، سوات، ایبٹ آباد، آزاد کشمیر، گلگت بلتستان سمیت پنجاب اورخیبر پختونخواکے متعدد شہروں میں محسوس کیے گئے، پاکستان کے علاوہ افغانستان، بھارت اور تاجکستان کے علاقوں میں بھی زلزلے کے جھٹکے محسوس کیے گئے، چین کے شمالی مشرقی صوبے ہیلانگ ژیانگ کے شہر موڈ انگ ژیانگ میں بھی زلزلے کے جھٹکے محسوس کیے گئے۔جنوبی ایشیاء کا خطہ زلزلوں کی زد میں ہے۔ حالیہ دنوں میں پاکستان کے شمال مغربی علاقے اور پنجاب میں تواتر سے زلزلے کے جھٹکے محسوس کیے جا رہے ہیں۔

ادھر حالت یہ ہے کہ حکومت کی جانب سے اس حوالے سے زیادہ اقدامات سامنے نہیں آ رہے۔ مستقبل میں بھی زلزلے کے جھٹکے آتے رہیں گے کیونکہ ہمارا خطہ فالٹ لائن پر ہے۔ حکومت کو شمال مغربی علاقے میں بڑے آبی ذخیرے یا کوئی اور بڑے منصوبے شروع کرنے سے پہلے زلزلوں کی صورت حال کا جائزہ لینا چاہیے۔یہ قدرتی وارننگ ہے اور قدرت کی وارننگ کو سمجھنا انسان کی بقا کے لیے انتہائی ضروری ہے۔