اولڈ سٹی ٹریڈنگ ایریا بھتہ خوری سمیت دیگر جرائم کی روک تھام کیلئے ایکشن پلان مرتب

اولڈ سٹی ٹریڈنگ ایریا میں بھتہ خوری، اغوا اور دیگر جرائم کی روک تھام کے لیے ترتیب دیے جانے والے ایکشن پلان کا نقشہ۔ فوٹو: فائل

---

کراچی کے اولڈ سٹی ٹریڈنگ ایریا میں بھتہ خوری، اغوابرائے تاوان، ٹارگٹ کلنگ سمیت دیگر جرائم کی روک تھام کے لیے کراچی چیمبر آف کامرس اینڈ انڈسٹری کے اکابرین متحرک ہوگئے ہیں۔

ذرائع نے ''ایکسپریس'' کو بتایا کہ کراچی چیمبر کے صدر ہارون اگر اور بزنس مین گروپ کے چیئرمین سراج قاسم تیلی ودیگر اکابرین نے اولڈ سٹی ٹریڈنگ ایریا کا تفصیلی دورہ کرنے کے بعد محکمہ پولیس اورسیٹزن پولیس لائژن کمیٹی کی مشاورت سے جرائم کی روک تھام کیلیے ایکشن پلان ترتیب دیدیا ہے۔

اس سلسلے میں کراچی چیمبر کی عمارت میں کے سی سی آئی کے صدر ہارون اگر کی صدارت میں ہونے والے ایک خصوصی اجلاس میں سی پی ایل سی کے چیف احمد چنائے، کراچی چیمبر کے سینئر نائب صدر احمد شمیم فرپو، نائب صدرناصر محمود کے علاوہ انجمن تاجران میرٹ روڈ کے صدررفیق جدون، کراچی الیکٹرانکس ڈیلرز ایسوسی ایشن کے چیئرمین ادریس میمن، کھارادر صرافہ مارکیٹ کے صدرحاجی ہارون چاند، میٹھادر کپڑا مارکیٹ، میڈیسن مارکیٹ، جامع کلاتھ، اسٹیل مارکیٹ، صدر مارکیٹ الائنس کے نمائندے، بولٹن مارکیٹ، جوڑیا بازار، یارن مارکیٹ، برتن بازار، پلاسٹک مارکیٹ سمیت اولڈ سٹی ٹریڈنگ ایریا کی دیگر مارکیٹوں کے نمائندوں نے شرکت کی۔

خصوصی اجلاس میں کراچی چیمبر کی جانب سے جرائم بھتہ خوری سمیت دیگر وارداتوں میں سرفہرست علاقے اولڈ سٹی ٹریڈنگ ایریا میں موثر حفاظتی اقدامات اورجرائم پیشہ عناصرکی سخت مانیٹرنگ کے لیے ایکشن پلان پیش کیا، اجلاس میں مجوزہ ایکشن پلان پرعملدرآمد کا طریقہ کار طے کرنے کے لیے محکمہ پولیس اور تاجر نمائندوں کے ساتھ مشاورت کے لیے آئندہ ہفتے ایک اور اجلاس طلب کرنے کا فیصلہ کیا گیا ہے، اجلاس کو بتایا گیا کہ اولڈ سٹی ٹریڈنگ ایریا سے متعلقہ تھانے کھارادر اور اس سے ملحقہ رسالہ، میٹھا در اور نیپئر روڈ پرقائم تجارتی مراکز کے اطراف میں مجموعی طور پر 33 نئی پولیس چوکیاں قائم کی جائیں گی۔

21 مزاحمتی بیریئرزلگائے جائیں گے جبکہ صرف اولڈسٹی ٹریڈنگ ایریا میں پٹرولنگ کے لیے30 موٹرسائیکلوں پرپولیس کی ریپڈ ری ایکشن فورس کو تعینات کیا جائے گا اوراس مخصوص علاقے کے اطراف میں پولیس کی5موبائل وینز ہمہ وقت تعینات رہیں گی، ایکشن پلان کے تحت کھارادر پولیس اسٹیشن کی حدود میں 27 چوکیاں قائم کی جائیں گی، ایکشن پلان کے تحت ہر پولیس چوکی پر ایک پولیس افسراور4 سپاہیوں کی تقرری کی جائے گی اور منصوبے کے تحت علاقے میں لگائے جانے والے 21 بیریئرز8 بجے شب بند کردیے جائیں گے۔

مشترکہ ایکشن پلان کے تحت جرائم پیشہ عناصر کی سرکوبی کو یقینی بنانے کی غرض سے پولیس کی سب سے زیادہ نفری پنجابی کلب سے لی مارکیٹ کے درمیان تعینات کی جائے گی، مجوزہ ایکشن پلان پر عملدرآمد کو یقینی بنانے اورجرائم میں ملوث عناصر کے خلاف پولیس کی تیز رفتار کاروائی کو یقینی بنانے کے لیے کراچی چیمبر آف کامرس نے اولڈ سٹی ٹریڈنگ ایریا کی تمام متاثرہ مارکیٹوں کے دو دو نمائندے لینے کا فیصلہ کیا ہے جو قیام امن کمیٹی کے لائژن رکن ہوں گے اور یہ نمائندے کراچی چیمبر کے علاوہ محکمہ پولیس اورسی پی ایل کے براہ راست رابطے میں ہونگے، کراچی چیمبر کے صدر ہارون اگر نے بتایا کہ گورنرسندھ ڈاکٹرعشرت العباد خان نے اولڈسٹی ٹریڈنگ ایریا میں کام کرنے والے تاجروں کو ہرممکن تحفظ فراہم کی یقین دہانی کرائی ہے لہٰذا مجوزہ سیکیورٹی پلان پر آنے والے اضافی اخراجات بھی حکومت سندھ برداشت کرے گی۔