جناح ٹرمینل فلائی اوور اگلے ماہ تک مکمل ہوگا ایڈمنسٹریٹر بلدیہ

شارع پاکستان پر 4 فلائی اوور کی تعمیر اگلے سال مارچ تک مکمل ہوجائے گی،گجر نالہ، اورنگی نالہ، سی بی ایم پل پر کام جاری ہے. فوٹو: فائل

---

بلدیہ عظمیٰ کراچی کے ایڈمنسٹریٹر محمد حسین سید نے کہا ہے کہ 289 ملین روپے کی لاگت سے تعمیر کیے جانے والے جناح ٹرمینل فلائی اوور کو اگلے ماہ کے آخر تک مکمل کرلیاجائے گا اور مقررہ وقت پر تعمیرمکمل کرنے کیلیے کام کو تیز کیا جائے۔

یہ بات انھوں نے جناح ٹرمینل فلائی اوور سمیت شہر میں جاری دیگر ترقیاتی منصوبوں کے دورے کے موقع پر کہی ڈائریکٹر جنرل ٹیکنیکل سروسز الطاف جی میمن ، سینئر ڈائریکٹر ٹرانسپورٹ اینڈ کمیونیکیشن محمد اطہر، ڈی جی ماس ٹرانزٹ رشید مغل ، پروجیکٹ ڈائریکٹر اور دیگر افسران بھی انکے ہمراہ تھے، ایڈمنسٹریٹر کراچی نے کہا کہ شارع فیصل پر بننے والے فلائی اوور سے ایئر پورٹ اور نیشنل ہائی وے پر جانیوالی ٹریفک کو سہولتیں میسر آئیں گی تین لین کے اس فلائی اوور کو مقررہ مدت سے 8 ماہ پہلے ہی مکمل کرلیا جائیگا۔

انھوں نے کہا کہ اس عوامی اہمیت کے حامل منصوبے کی تعمیر سے ایئرپورٹ تک ٹریفک بلارکاوٹ آسکے گی منصوبے کی تعمیر میں اس بات کا خاص خیال رکھا جائیگا کہ شارع فیصل پر ٹریفک کی روانی متاثر نہ ہواور ائیر پورٹ آنے اور جانیوالے مسافروں کو کسی قسم کی تکلیف کا سامنا نہ کرنا پڑے، اس موقع پربریفنگ دیتے ہوئے ڈائریکٹر جنرل ٹیکنیکل سروسزالطاف جی میمن نے بتایا کہ اس فلائی اوور کی کل لمبائی 570 میٹر ہے جبکہ پروجیکٹ کی تعمیر میں مقررہ کردہ معیار کو پیش نظر رکھا جارہا ہے انھوں نے بتایا کہ فلائی اوورمیں اسپین کی تعداد 9ہے اور اس فلائی اوور کی چوڑائی 10.5ہے۔

محمد حسین سید نے کہا بلدیہ عظمیٰ کراچی ملیر 15اور کالا بورڈ پر بھی فلائی اوور تعمیر کرے گی جس کے لیے 24ملین روپے کا بجٹ رکھا گیا ہے انھوں نے پروجیکٹ ڈائریکٹر کو ہدایت کی کہ وہ صرف کنسلٹنٹ پر کام کو نہ چھوڑیں بلکہ از خود ہمہ وقت پروجیکٹ پر موجود رہیں اور کام کے معیا ر کو یقینی بنائیں، انھوں نے کہا کہ شاہراہ پاکستان پر 4 فلائی اوور اگلے سال مارچ تک مکمل کرلیے جائیں گے جبکہ مہران ہوٹل انڈر بائی پاس اور شاہین کمپلیکس فلائی اوور پر کام کا آغاز بھی اسی ماہ کردیا جائے گا گجر نالہ ،اورنگی ٹائون نالہ، سی بی ایم پل پر تعمیراتی کام تیزی سے جاری ہے۔