درآمدی ایل ای ڈی لائٹس پرٹیکس چوری کاالزام

متعددکھیپ رعایتی ڈیوٹی وٹیکسزپرکلیئرکرائیں،آڈٹ آبزرویشن کاجواب نہیںدیا،ذرائع فوٹو: فائل

---

پاکستان کسٹمز ایڈجیوڈکیشن کلکٹریٹ کراچی نے ایل ای ڈی لائٹس کے درآمدی کنسائمنٹ کی کلیئرنس میں کسٹمز ڈیوٹی و ٹیکسوں میں غیرقانونی طور پر رعایت حاصل کرنے پر درآمدکنندہ کو شوکازنوٹس جاری کردیا۔

ذرائع نے ''ایکسپریس'' کو بتایا کہ درآمدکنندہ کمپنی میسرز شاہد برادرزنے کسٹمز ڈیوٹی، سیلز ٹیکس اور انکم ٹیکس قانون میں موجود رعایت غلط طریقے سے حاصل کرتے ہوئے مختلف واٹ پینل کی ایس ایم ڈی / ایل ای ڈی کے متعدد درآمدی کنسائمنٹس کی کسٹمز کلیئرنس حاصل کی۔

اس طرح سے مذکورہ درآمدکنندہ نے رعایت کا ناجائزفائدہ اٹھاتے ہوئے قومی خزانے کو ریونیو کی مد میں 3 کروڑ 52 لاکھ روپے کا نقصان پہنچایا جبکہ کمپنی کی جانب سے درآمد کیے گئے آئٹمز 240 واٹ سے زائد پاورکے حامل ہیں، پاکستان میں اسٹینڈرڈ انرجی 240 واٹ طاقت تک محدود ہے لہٰذا مذکورہ درآمدی کنسائمنٹس پر رائج قوانین کے تحت ڈیوٹی وٹیکسوں میں رعایت نہیں دی جاسکتی۔

ذرائع نے بتایا کہ مذکورہ کمپنی کے آڈٹ کے بعد پاکستان کسٹمز کے ماتحت ڈائریکٹوریٹ آف پوسٹ کلیئرنس آڈٹ کراچی نے ریونیو کی مد میں چوری شدہ رقم کی ادائیگیوں کی ہدایت کی تھی لیکن بے قاعدگی میں ملوث میسرز شاہد برادرز نے ڈائریکٹوریٹ کی آڈٹ آبزرویشن کا کوئی جواب نہیں دیا ۔

جس پر پوسٹ کلیئرنس آڈٹ نے مذکورہ درآمدکنندہ کے خلاف کنٹروانشن رپورٹ متعلقہ کسٹمز ایڈجیوڈکیشن کلکٹریٹ کو ارسال کردی تھی تاکہ وہ درآمدکنندہ کے خلاف قانون کے مطابق مزید کارروائی عمل میںلائے۔ ذرائع نے بتایاکہ متعلقہ کسٹمز ایڈجیوڈکشن کلکٹریٹ نے تمام حقائق کی روشنی میںمیسرز شاہد برادرز کو شوکاز نوٹس جاری کرتے ہوئے ہدایت کی ہے کہ وہ 3 کروڑ 52 لاکھ روپے مالیت کی کسٹمز ڈیوٹی و ٹیکسوںکی ادائیگیاں کرے۔