صنعتی اور تجارتی علاقوں میں9ہزار سے زائد کیمرے لگائے جائینگے کمشنر

تاجروں کو انکی نمائندہ تنظیموں کے توسط سے اسلحہ لائسنس جاری کیے جائیں گے، ہاشم رضا،’’ پیس کمیٹیاں ‘‘ بنانے کی تجویز فوٹو: فائل

---

کمشنر کراچی سید ہاشم رضا زیدی نے کہا ہے کہ بھتہ خوری اور پرچی مافیا کے خاتمے کیلیے مختلف صنعتی اور تجارتی علاقوں میں کے ایم سی، سندھ پولیس اور ڈپٹی کمشنر سائوتھ کی جانب9ہزارسے زائد سی سی ٹی وی کیمرے لگائے جائینگے جنھیں کمانڈ اینڈ کنٹرول سسٹم اور سندھ پولیس کے کنٹرول روم کے تحت مانیٹر کیا جائے گا۔

ان خیالات کا اظہار انھوں نے سندھ تاجر اتحادکے ایک نمائندہ وفد سے اجلاس کے موقع پر کیا، اجلاس میں چیئرمین جمیل احمد پراچہ، صدر شیخ حبیب ، وائس چیئرمین ایم کاشف میرانی ،جنرل سیکریٹری اسماعیل لال پوریا ،سرپرست اعلیٰ ایم نظامی ،نائب صدر ایم ارشد ،حسین قریشی اورپریس سیکریٹری احمد قادری کے علاوہ دیگر نمائندے بھی شامل تھے جبکہ ایڈیشنل کمشنر کراچی ون کامران شمشاد، ڈپٹی کمشنر سائوتھ مصطفی جمال قاضی ،چیف سی پی ایل سی احمد چنائے اور ڈائریکٹر میڈیا محمدشبیہ صدیقی بھی موجود تھے ، کمشنرنے کہا کہ سیکیورٹی اور سرویلنس کیمروں کی مدد سے کراچی کی مارکیٹوں کی تمام دکانوں اور پتھاروں پر حفاظتی نقطہ نظر سے کڑی نگرانی کی جائیگی اور ان کیمروں کا مقصد صنعت کاروں ، تاجروں اور عوام کو بھتہ خوروں اور پرچی مافیاسمیت دیگر جرائم سے نجات دلانا ہے۔



انھوں نے کہا کہ سی سی ٹی وی کیمروں کی مدد سے کسی بھی ناخوشگوارصورتحال ،بھتہ خوری یا دیگر جرائم کے حوالے سے واقعے پر کمانڈ اینڈ کنٹرول سسٹم اور محکمہ پولیس کا کنٹرول روم مارکیٹوں میں تعینات موبائل گاڑیوں یا پولیس پکٹس میں موجود اہلکاروں کو اطلاع دیگا ، تاجروں کو ان کی نمائندہ تنظیموں کے توسط سے اسلحہ لائسنس جاری کیے جائینگے،اس موقع پر تاجروں نے کمشنر کراچی کو تجویز پیش کی کہ ہر مارکیٹ میں '' پیس کمیٹیاں '' بنائی جائیں جو کہ متعلقہ پولیس افسران او رڈپٹی کمشنر یا اسسٹنٹ کمشنر سے رابطوں میں ہوں۔