حکیم اللہ محسود چھپنے کے بجائے سامنے آئے رحمن ملک

افغان صدرکرزئی فضل اللہ اورپیراللہ کوپاکستان کے حوالے کریں،دہشتگردی کے واقعات میں مقامی لوگ ملوث ہیں باہرسے کوئی نہیں آرہا۔ فوٹو: ثناء/فائل

---

وفاقی وزیر داخلہ رحمن ملک نے حکیم اللہ مسعود چھپنے کے بجائے کھل کر سامنے آئے اوردنیا کو بتائے کہ وہ کتنا بڑا ظالم ہے،وہ جمعرات کو سکھرایئرپورٹ پر میڈیا سے گفتگوکررہے تھے۔

رحمن ملک نے نام نہادترجمان احسان اللہ احسان کی مذاکرات کے لیے پیشکش مسترد کرتے ہوئے کہا کہ میں اس کے بیان کی مذمت کرتاہوں۔وفاقی وزیرداخلہ نے افغانستان کے صدر حامد کرزئی سے اپیل کی کہ مولوی فضل اللہ اور پیراللہ کو پاکستان کے حوالے کردیں،عصمت اللہ معاویہ اپنے خط کے ذریعے ہمیں سبق پڑھانے کی کوشش نہ کرے، کالعدم لشکر جھنگوی نے ن لیگ اور تحریک انصاف کی حمایت میں بیان جاری کیا ہے۔ انھوں نے کہا کہ دہشت گردی کے واقعات میں مقامی لوگ ہی ملوث ہیں باہر سے کوئی نہیں آرہا۔ صورتحال پر قابو پانے کے لیے پولیس اور دوسرے سیکیورٹی اداروں کی کارکردگی بہتر بنارہے ہیں ٗکسی اورکے لیے کام کرنے والوں کوجلد پکڑ لیا جائیگا ۔



دہشتگردی پرقابو پانے کے لیے حکومت نے سخت اقدامات کیے ہیں جس کی وجہ سے دہشتگردی کے واقعات میں کمی ہوئی ہے۔ ملک میں پہلے دہشتگردی زیادہ تھی، چار پانچ روز میں ایک دھماکا ہوتا تھا یہ گوریلا ایکشن ہے جس میں لاکھوں افراد شریک ہیں، ہم سندھ اورخیبرپختونخواکی صوبائی حکومتوں سے ملکر دہشتگردی کے خلاف کام کررہے ہیں،انھوں نے کہاکہ ملک میں جمہوریت کو ختم کرنے کی سازش کی جارہی ہے،مفاہمت کی سیاست کے ذریعے سازش کو ناکام بنادینگے، بشیر بلور کی ہلاکت کی ذمے داری قبول کرنے والے احسان اللہ احسان کی کوئی حثیت نہیں میں اس کے ہربیان کو رد کرتاہوں۔ہم سب شہید بھٹو اور شہید بینظیر بھٹو کے جیالے ہیں، مشکلات سے نہیں گھبراتے، پارٹی کی سینٹرل ایگزیکٹیو کمیٹی کے اجلاس میں کل اہم فیصلے کیے جائینگے۔انھوںنے کہاکہ پارٹی قیادت کو بہترپتا ہوتا ہے کہ کون کس عہدے کے لیے بہتر ہے۔