بھارتی فلموں کی ریلیز سے بھی خوفزدہ نہیں منور سعید

اگر فلمسازی میں تیزی آئے تو یقینا فلم بین پھر اپنی فلموں کی طرف آئیں گے، منور سعید۔ ۔فوٹو : فائل

---

ممتاز اداکار و صداکار منور سعید نے کہا ہے کہ موجودہ حالات میں فلمی صنعت ، سینما ٹریڈ سے مایوس نہیں ہوں۔

ملک میں بھارتی فلموں کی ریلیز سے بھی خوفزدہ نہیں ،بھارتی فلمیں اس وقت سینما گھروں کی ضرورت ہیں، ہمارے فلم بین بھی اپنے فنکاروں اور فلموں سے اکتائے نہیں ۔یہ بات انھوں نے میڈیاسے گفتگو کرتے ہوئے کہی انھوں نے کہا کہ ہمارے یہاں فلمسازی بعض وجوہ کی بناء پر بحران سے دو چار ہے۔

سینما گھروں کو فلمیں چاہئیں، اس مقصد کے لیے قبل ازیں انگریزی فلمیں چلتی رہی ہیں اب بھارتی فلمیں ریلیز کی جاتی ہیں لیکن کچھ عرصہ میں ہماری انڈسٹری اس بحران سے نکل آئے گی اور ہم پہلے کی طرح اس خطہ میں اپنی پہچان اور انداز بحال کرانے میں کامیاب رہیں گے۔

انھوں نے کہا کہ بھارت میں سالانہ بارہ سو سے زائد فلمیں بنتی اور ریلیز ہوتی ہیں لیکن اس میں بارہ فلموں کو بھی غیر معمولی رسپانس نہیں ملتا پاکستان میں جب سے سینما گھروں میں ان کی ریلیز شروع ہوئی ہے کسی ایک فلم نے بھی غیر معمولی رسپانس نہیں کیا انھوں نے مزید کہا کہ ہمارے یہاں اس وقت بھی اچھے تخلیق کار اور ہدایتکار و فلمساز ہیں اگر فلمسازی میں تیزی آئے تو یقینا فلم بین پھر اپنی فلموں کی طرف آئینگے ۔