دہشت گردی سے متعلق آرمی چیف کا بیان حقیقت پر مبنی ہے نوید قمر

نوید قمر نے کہا کہ کچھ لوگوں کو خطرہ ہے کہ اگر انتخابات ہوئے تو پیپلز پارٹی دوبارہ کامیاب ہو کر آ جائے گی۔ فوٹو: فائل

---

وزیر دفاع سید نوید قمر نے کہا ہے کہ دہشتگردی کے حوالے سے آرمی چیف کا بیان حقیقت پر مبنی ہے۔

پاکستان اپنے دفاعی معاملات سے غافل نہیں رہ سکتا، مغربی سرحد سے پاکستان میں آنے والی دہشت گردی کے خلاف خصوصی توجہ دینا ہو گی تاکہ پاکستانی عوام کا تحفظ کیا جا سکے۔ ان خیالات کا اظہار انہوں نے ہفتے کے روز ٹنڈو محمد خان میں پیپلز پارٹی کے بانی شہید ذوالفقار علی بھٹو کی85 ویں سالگرہ کی تقریب کے موقع پر میڈیا سے بات کر تے ہوئے کیا۔ ان کا کہنا تھا کہ جمہوریت کے خلاف نئی سازش کی جا رہی ہے کچھ لوگوں کو خطرہ ہے کہ اگر انتخابات ہوئے تو پیپلز پارٹی دوبارہ کامیاب ہو کر آ جائے گی۔

پورے ملک سے اسلام آباد میں5لاکھ افراد جمع کرنا کوئی بڑی بات نہیں، پیپلز پارٹی چاہے تو صرف ٹنڈو محمد خان سے 5 لاکھ افراد جمع کر سکتی ہے، علامہ طاہر القادری پہلے بھی مایوس ہوکر ملک سے چلے گئے تھے اب بھی ایسا ہی ہوگا۔ ان کا کہنا تھا کہ جمہوریت کے خلاف چاہے کوئی مولوی کی شکل میں آئے یا کلین شیو کوئی فرق نہیں پڑتا، پیپلز پارٹی نے جمہوریت کیلیے خون دیا ہے، وہ اس کی حفاظت کرنا بھیجانتی ہے۔



ان کا کہنا تھا کہ ایم کیو ایم، پیپلز پارٹی کی اتحادی جماعت ہے، انہیں حکومت میں رہتے ہوئے لانگ مارچ کی حمایت نہیں کرنی چاہیے۔ قبل ازیں انہوں نے ذوالفقار علی بھٹو کی سالگرہ کا کیک کاٹا۔ تقریب سے خطاب کرتے ہوئے ان کا کہنا تھا کہ پیپلز پارٹی شہیدوں کی جما عت ہے جس نے 5 سالہ دور حکومت میں تمام تر مشکل حالات کے باوجود عوام کی خدمت کی اور آئندہ انتخابات میں بھی پیپلز پارٹی بھاری اکثریت سے جیت کر حکومت بنائے گی۔ انہوں نے کارکنوں کو ہدایت کی کہ وہ انتخابات کی تیاری کریں۔ تقریب میں ڈپٹی کمشنر ٹنڈو محمد خان آصف میمن، سید اعجاز شاہ بخاری اور سید اعجاز نبی شاہ بھی موجود تھے۔