اسپاٹ فکسنگ کیس: برطانیہ میں ایک اور گرفتاری

لندن : میچ اور اسپاٹ فکسنگ کیس میں برطانیہ میں ایک اور ملزم کو گرفتار کر لیا گیا ہے۔

برطانیہ کی نیشنل کرائم ایجنسی کے مطابق پاکستان سپر لیگ میں میچ فکسنگ اسکینڈل میں ملوث ایک اور شخص کو شیفیلڈ سے گرفتار اور بعد ازاں ضمانت پر رہا کر دیا گیا ہے۔ این سی اے کے مطابق فکسنگ کے معاملہ پر پاکستان کرکٹ بورڈ اور آئی سی سی اینٹی کرپشن یونٹس کے ساتھ مل کر کام کر رہے ہیں۔ فکسنگ معاملے پر یہ برطانیہ میں ہونے والی تیسری گرفتاری ہے، اس سے قبل 13 فروری کو ناصر جمشید اور مبینہ بکی یوسف کو گرفتار کیا گیا تھا اور بعد ازاں ضمانت پر رہا کر دیا گیا تھا۔

اس خبر کو بھی پڑھیں : اسپاٹ فکسنگ کیس میں شرجیل خان اور خالد لطیف کو چارج شیٹ جاری

واضح رہے کہ پاکستان سپر لیگ میں بکیز سے روابط کے الزام میں اسلام آباد یونائیٹڈ کے شرجیل خان اور خالد لطیف کو پی سی بی نے معطل کرتے ہوئے شوکاز نوٹس جاری کیے ہوئے ہیں، اینٹی کرپشن کوڈ کی خلاف ورزی پر ناصر جمشید کو بھی معطل کر رکھا ہے جبکہ محمد عرفان کے خلاف بھی تحقیقات کی جا رہی ہیں۔