کس ملک میں ہے انٹرنیٹ سب سے تیزرفتار؟

اسمارٹ موبائل فون کی ایجاد کے بعد دنیا بھر میں اس کا استعمال برق رفتاری سے بڑھا۔ اس کی بنیادی وجہ انٹرنیٹ کی سہولت تھی۔

آج دنیا کے کونے کونے میں اسمارٹ فون کے ذریعے انٹرنیٹ سے استفادہ کیا جارہا ہے۔ فور جی ٹیکنالوجی متعارف ہونے کے بعد موبائل انٹرنیٹ کی رفتار پہلے کی نسبت خاصی بہتر ہوگئی ہے۔ پھر بھی بعض خطوں میں انٹرنیٹ دوسرے علاقوں کی نسبت سست رفتار ہے۔ ذرا بتائیے تو انٹرنیٹ سب سے زیادہ تیز کس ملک میں چلتا ہے؟

آپ سوچ رہے ہوں گے کہ امریکا کیوں کہ ٹیکنالوجی میں وہ سب سے آگے ہے۔ مگر نہیں جناب امریکی شہری سب سے تیز رفتار انٹرنیٹ سے مستفید ہوتے۔ آپ یہ جان کر حیران ہوں گے تیزرفتار انٹرنیٹ کی دوڑ میں امریکا بہت پیچھے ہے۔

ایک ٹیکنالوجی کمپنی کی جانب سے کی گئی اسٹڈی میں بتایا گیا ہے کہ تیزرفتار انٹرنیٹ کی فہرست میں امریکا اٹھائیسویں نمبر پر ہے۔ اس تحقیقی مطالعے میں باسٹھ ممالک کو شامل کیا گیا تھا۔ دوران تحقیق ترقی یافتہ کے علاوہ ترقی پذیر ممالک میں بھی موبائل انٹرنیٹ کی رفتار کا جائزہ لیا گیا۔ جب رفتار کے لحاظ سے فہرست ترتیب دی گئی تو برطانیہ 26 میگابٹ فی سیکنڈ کے ساتھ پہلے نمبر پر تھا۔ برطانویوں کے بعد جرمن شہری تیزترین موبائل انٹرنیٹ سے مستفید ہورہے ہیں۔ وہاں انٹرنیٹ کی رفتار 24.1  میگابٹ فی سیکنڈ ہے۔ تیسرے نمبر پر فن لینڈ ہے، جہاں انٹرنیٹ 21.6 میگا بٹ فی سیکنڈ کی رفتار سے دوڑ رہا ہے۔

آپ یہ جان کر حیران ہوں گے کہ امریکا کے مقابلے میں کینیا جیسے پس ماندہ ملک میں موبائل انٹرنیٹ کی رفتار زیادہ ہے۔13.7 میگابٹ فی سیکنڈ کی رفتار کے ساتھ کینیا چودھویں نمبر پر رہا۔ امریکا میں نہ صرف انٹرنیٹ کی رفتار کم ہے بلکہ ڈاؤن لوڈنگ کے لحاظ سے بھی یہ کئی ممالک سے پیچھے ہے۔ تیزترین ڈاؤن لوڈنگ کی سہولت مہیا کرنے والے ممالک میں امریکا دسویں نمبر پر ہے۔ یہاں ڈاؤن لوڈنگ کی اوسط رفتار 18 میگا بٹ فی سیکنڈ ہے۔

اسٹڈی کے مطابق انٹرنیٹ کنیکشن کی اوسط عالمی رفتار، ہر سال پندرہ فی صد اضافے کے ساتھ 7.2 میگا بٹ فی سیکنڈ کی سطح پر پہنچ چکی ہے۔