کولمبیا کی جیل میں قید منشیات کی خواتین اسمگلر قیدیوں کے درمیان مقابلہ حسن

مقابلے میں نہ تو عمر کی کوئی قید ہے اور نہ ہی اسمارٹ ہونے کی شرط، بس جیل کا قیدی ہونا ضروری ہے۔


ویب ڈیسک September 30, 2013
مقابلے میں نہ تو عمر کی کوئی قید ہے اور نہ ہی اسمارٹ ہونے کی شرط، بس جیل کا قیدی ہونا ضروری ہے۔

خوبصورت، نازک اندام، جاذب نظر اور ذہین، یہی خوبیاں دیکھی جاتی ہیں دنیا بھر میں ہونے والے خواتین کے مقابلہ حسن میں لیکن لاطینی امریکی ملک کولمبیا کی جیل میں ہوا خواتین قیدیوں کے درمیان سب سے زیادہ خوبصورت نظر آنے کا مقابلہ، جس میں نہ تو عمر کی قید ہے اور نہ ہی نزاکت کی۔

کولمبیا کے دارالحکومت بگوٹا کی بیون پاسٹر جیل میں 2ہزار 2 سو سے زائد خواتین قید ہیں اور ان میں اکثریت منشیات کے کاروبار میں کسی نہ کسی طرح ملوث قرار پائی گئی ہیں لیکن جیل انتظامیہ کا کیا کیجئے جو گزشتہ 18 برسوں سے خواتین قیدیوں کے درمیان مقابلہ حسن کا اہتمام کراتی ہے، رواں برس بھی یہ مقابلہ ہوا اور اس مقابلہ حسن کے جج تھے ملک کے مایہ ناز گلوکار اور ٹی وی کے مشہورفنکار۔

مقابلے میں نہ تو عمر کی قید ہے اور نہ ہی اسمارٹ ہونے کی شرط، شرط ہے تو صرف یہ کہ وہ اس سے پہلے کبھی جیل میں ہونے والے مقابلہ حسن میں شریک نہ ہوئی ہو۔ یہی وجہ ہے کہ اس مقابلے میں جہاں قاتل حسینائوں نے حصہ لیا وہیں 3 بچوں اور 9 پوتے پوتیوں کی دادی اماں نے بھی اپنے حسن کے جلوے بکھیرے۔

مقابلہ حسن کے حوالے سے جیل کی ایک اہلکار کا کہنا ہے کہ اس مقابلے کا حصہ بن کر خواتین کچھ دیر کے لئے اپنی تمام تر پریشانیاں بھول کر تفریح کرتی ہیں اور خوش ہوتی ہیں۔ اس مقابلے کے ذریعے قیدی خواتین کو اپنے خوبصورت ہونے کا احساس ہوتا ہے اور انہیں خوشی کے دو پل میسر آ جاتے ہیں جو کہ جیل کی اس تناؤ بھری زندگی میں ہوا کے ٹھنڈے جھونکے سے کسی بھی طرح کم نہیں۔