امریکا میں پولیس نے نقلی اسلحہ رکھنے والے بچے کو گولی مارکر ہلاک کردیا

کلیولینڈ: امریکی ریاست اوہایو میں پولیس اہلکاروں نے کھیل کے میدان میں نقلی بندوق لے کر آنے والے 12 سالہ بچے کو گولی مارکر ہلاک کردیا۔

غیرملکی خبررساں ادارے کے مطابق امریکی ریاست اوہایو کے شہر کلیولینڈ میں تمیر رائس نامی 12 سالہ بچہ نقلی بندوق لے کر کھیل میں ایک میدان میں آگیا اور وہاں موجود لوگوں کو ڈرانے لگا، واقعے کی اطلاع ملنے پر پولیس کے دو اہلکار وہاں پہنچے اور انہوں نے بچے کو ہاتھ اٹھانے کا حکم دیا ، اسی اثنا میں بچے نے اپنی پتلون میں پھنسائی بندوق کو نکالنے کی کوشش کی جس پر پولیس اہلکاروں نے گولی چلادی، فائرنگ سے تمیر رائس شدید زخمی ہوگیا ، اسے اسپتال منتقل کیا گیا جہاں وہ دم توڑ گیا۔

کلیولینڈ پولیس کے نائب سربراہ ایڈ ٹومبا کے مطابق  بچے کے پاس نقلی ’ ایئرسوفٹ‘ بندوق تھی جو کہ ایک نیم خودکار پستول کی مانند دکھائی دے رہی تھی۔ بچے نے نہ تو کسی کو کوئی دھمکی دی تھی اور نہ ہی پولیس افسران پر بندوق تانی تھی۔ اس کے باوجود پولیس کی جانب سے فائرنگ کرنے کی وجوہات کے بارے میں جاننے کے لئے تحقیقات شروع کر دی گئی ہیں اور دونوں پولیس افسران کو تفتیش مکمل ہونے تک چھٹی پر بھیج دیا گیا ہے۔