اورنگی ٹاؤن اردو چوک میں رینجرز کی گھر گھر تلاشی مکینوں کا احتجاج

رینجرز نے30ملزمان کو حراست میں لیا جبکہ گھر گھر تلاشی کے دوران بڑی تعداد میں اسلحہ بھی برآمد کیا گیا۔فوٹو: فائل

---

رینجرز نے شہرکے مختلف علاقوں میں کارروائیوں کے دوران30ملزمان کو حراست میں لیکر ان کے قبضے سے اسلحہ برآمدکرلیا۔

اورنگی ٹاؤن کے علاقے اردو چوک پر رینجرز کی کارروائی کیخلاف علاقہ مکینوں نے احتجاج کیا اور سڑک پر مظاہرہ کیا، حراست میں لیے گئے افراد کا تعلق مختلف سیاسی اور کالعدم تنظیموں سے ہے، تفصیلات کے مطابق رینجرزنے خفیہ اطلاعات کی بنیاد پرشہرکے مختلف علاقوں میں آپریشن کیے۔

سہراب گوٹھ کے علاقے فقیرا گوٹھ، چنیسر گوٹھ، ناظم آباد ، ڈاکس کے علاقے مچھرکالونی اور اورنگی ٹاؤن کے علاقے اردو چوک میں رینجرز نے گھر گھر تلاشی کا عمل شروع کیا، اس دوران بھاری نفری علاقے کے داخلی و خارجی راستوں پر تعینات رہی،کسی کو بھی علاقے میں داخل ہونے یا علاقے سے باہر جانے کی اجازت نہیں دی گئی اور آمدروفت مکمل طور پر بند کردی گئی۔



آپریشن میں رینجرز کے کمانڈوز اور لیڈی سرچرز نے بھی حصہ لیا ، مختلف علاقوں سے رینجرز نے30ملزمان کو حراست میں لیا جبکہ گھر گھر تلاشی کے دوران بڑی تعداد میں اسلحہ بھی برآمد کیا گیا ، حراست میں لیے گئے افراد میں16ٹارگٹ کلرز بھی شامل ہیں۔

مذکورہ افراد کو آنکھوں پر پٹیاں باندھ کر تفتیش کی غرض سے نامعلوم مقام پر منتقل کردیا گیا ، رینجرز کے ترجمان میجر سبطین کے مطابق شہر کے مختلف علاقوں سے 30 ملزمان کو حراست میں لے کر ان کے قبضے سے مختلف اقسام کے29ہتھیار برآمد کیے گئے جن میں ایس ایم جی بھی شامل ہے ، علاوہ ازیں اورنگی ٹاؤن کے علاقے اردو چوک پر رینجرز کی کارروائی کے خلاف علاقہ مکینوں نے سڑک پر مظاہرہ کیا،ان کا کہنا تھا کہ رینجرز نے بلاجواز گھروں پر چھاپے مار کر گرفتاریاں کی اور بے گناہ افراد کو حراست میں لیا گیا، مظاہرے میں خواتین کی بھی بڑی تعداد شریک تھی۔