اسمبلیاں اپنی مدت پوری کریں گی خواجہ آصف

عام انتخابات مقررہ مدت میں ہوں گے، خواجہ آصف: فوٹو: فائل

---

وزیر خارجہ خواجہ آصف کا کہنا ہے کہ حکومت اور اسمبلیاں اپنی مدت پوری کریں گی۔

لندن میں میڈیا سے بات کرتے ہوئے خواجہ آصف نے کہا کہ پارلیمنٹ کا اپنا دباؤ ہے لیکن پاکستان میں حالات مستحکم ہیں، حکومت اور اوراسمبلیاں اپنی مدت پوری کریں گی اور عام انتخابات مقررہ مدت میں ہوں گے۔ اپوزیشن جماعتیں سیاسی اتحاد ضرور بنائیں ، یہ ان کا حق ہے لیکن حکومت اپنا دفاع کرنا جانتی ہے۔

خواجہ آصف کا کہنا تھا کہ نواز شریف نے جو وعدے کئے تھے انہیں پورا کیا جارہا ہے ، حکومت 70 فیصد ایجنڈا حاصل کرچکی ہے اور دیگر مسائل پر بھی جلد قابو پالیا جائے گا۔ انہوں نے کہا کہ انہیں لندن میں سرکاری نوعیت کی ملاقاتیں کرنی ہیں اس کے علاوہ وہ نواز شریف سے بھی ملاقات کریں گے۔

واضح رہے کہ گزشتہ روز اسپیکر قومی اسمبلی سردار ایاز صادق نے کہا تھا کہ انہیں نہیں لگتا کہ اسمبلیاں مدت پوری کریں گی، ایسا محسوس ہوتا ہے کہ ایسا کچھ ہونے والا ہے جو ملک کے مفاد میں نہیں۔