عراق بم دھماکوں سے گونج اٹھا50 افراد ہلاک 170زخمی

عراقی دارالحکومت بغداد میں کار بم دھماکے کے بعد علاقہ مکین تباہ شدہ گاڑی کے قریب کھڑے ہیں ۔ فوٹو : اے ایف پی

---

عراقی دارالحکومت بغداد اور دیگر شہروں میں یکے بعد دیگرے بم دھماکوں اور فائرنگ کے واقعات میں50 افراد ہلاک اور170 زخمی ہوگئے۔

ذرائع ابلاغ کے مطابق بغداد اوردیگر شہروں میں20 سے زائد دھماکے ہوئے اور فائرنگ کے کئی واقعات پیش آئے، زیادہ تر واقعات میں شیعہ مسلمانوں کو نشانہ بنایاگیا تھا، زیادہ تر حملے بغداد کے شمال مشرقی علاقے میں ہوئے، حکام نے 2 صوبوںمیں صوبائی انتخابات کو ملتوی کردیا ہے۔

دھماکے اور حملے اس دن ہوئے جب عراق میں امریکی حملے کو 10سال مکمل ہوگئے ہیں، حکام کے مطابق بغداد اور دیگر شہروں میں 15 کار بم دھماکے، 2 خودکش حملے اور اس کے علاوہ سڑک کنارے بم دھماکے اور فائرنگ کے کئی واقعات ہوئے ہیں۔



ان تمام پر تشدد واقعات میں 50 افراد ہلاک اور170 زخمی ہوئے ہیں، ابھی تک کسی گروپ نے ذمے داری قبول نہیں کی ہے، دھماکے اور حملے اس دن ہوئے ہیں جب عراق میں امریکی حملے کو 10سال مکمل ہوگئے ہیں۔

پرتشدد واقعات کے باعث عراقی حکام نے دو صوبوں انبار اور نینوا میں انتخابات کو ملتوی کردیا ہے، اے ایف پی کے مطابق حملوں کے بعد سیکیورٹی فورسز نے چیک پوائنٹس پر تلاشی شروع کر دی ہے اور تمام اہم راستوں کو بند کر دیا ہے۔ بغداد میں عراقی سیکیورٹی فورسز نے 26 شدت پسندوں کو درجنوں بمبوں اور میزائلوں کے ساتھ گرفتارکرنے کا دعویٰ کیا ہے۔