کراچی میں فائرنگ سے متحدہ کے کارکن سمیت مزید 8 جاں بحق

موچکو،پاک کالونی اورمیراں ناکہ میں3افراد مارے گئے،رات گئے پرانا حاجی کیمپ سے بھی ایک لاش ملی ،بھتہ نہ دینے پر2افرادزخمی۔ فوٹو: فائل

---

کراچی کے مختلف علاقوں میں فائرنگ کے واقعات میں متحدہ قومی موومنٹ کے کارکن سمیت8افراد ہلاک اور 2 زخمی ہوگئے۔

تفصیلات کے مطابق اورنگی ٹائون سیکٹر 13-Hمیں نامعلوم ملزمان کی فائرنگ سے40سالہ دلاورخان ہلاک ہوگیا،مقتول اورنگی سیکٹر 13-G کارہائشی اور متحدہ قومی موومنٹ کا کارکن اورمحکمہ باغات کا ملازم تھا ، واقعے کے وقت وہ موٹرسائیکل پر جارہا تھا کہ موٹر سائیکل سوار ملزمان نے فائرنگ کرکے ہلاک کردیا۔بلدیہ کے علاقے مواچھ گوٹھ قبرستان سے نوجوان لڑکااورلڑکی کی لاشں ملیں،لڑکے کی شناخت22 سالہ احمد رضاجبکہ لڑکی کی شناخت 20 سالہ بشریٰ کے نام سے ہوئی،دونوں کو قبرستان میں ہی لاکر نامعلوم ملزمان نے فائرنگ کرکے ہلاک کیا،بشریٰ گھاس منڈی کی رہائشی جبکہ احمد رضارامسوامی کا رہائشی تھا۔

ورثاکاکہناہے کہ دونوں جمعرات کی دوپہر 3 بجے سے اپنے اپنے گھروں سے نکلے تھے جس کے بعددونوںکا کوئی پتہ نہیں چل سکااورجمعے کوان کی لاشیں مل گئیں،پولیس واقعے کو محبت کا شاخسانہ قراردے رہی ہے۔ بلدیہ ٹائون کے علاقے موچکومیں فائرنگ سے35 سالہ شاہدہلاک ہوگیا،مقتول کااقبال نامی شخص سے رقم کا تنازع چل رہاتھاجس نے اپنے ساتھیوں کے ہمراہ فائرنگ کرکے اسے ہلاک کردیا،پولیس ملزم کی تلاش میں مختلف مقامات پر چھاپے ماررہی ہے،مقتول پیشے کے اعتبار سے رنگ ساز تھا۔



پاک کالونی کے علاقے میں زمیندارہوٹل اور طیبہ مسجدکے قریب فائرنگ سے 25 سالہ نامعلوم شخص ہلاک ہو گیا، مقتول کی شناخت نہیں ہوسکی۔شیرشاہ میراں ناکہ شاہین ہوٹل کے قریب موٹرسائیکل سوارملزمان کی فائرنگ سے24 سالہ عنایت خان ہلاک ہوگیا،فائرنگ سے بھگدڑ مچ گئی اورخوف و ہراس پھیل گیا،مقتول کی شناخت اس کی جیب سے ملنے والے شناختی کارڈسے ہوئی جبکہ اس پر آبائی پتہ باجوڑ لکھاہے۔

سولجر بازارایک نمبرپربھتہ نہ دینے پرڈیکوریشن کی دکان پرموٹرسائیکل سوارملزمان کی فائرنگ سے58سالہ عبدالسلام اور 16 سالہ عبدالسلام زخمی ہوگئے ، دونوں ڈیکوریشن کی دکان پرملازمت کرتے ہیں۔نیپئر کے علاقے پرانا حاجی کیمپ سریا گلی سے بوری بند لاش ملی جس کی اطلاع پر پولیس نے موقع پر پہنچ کر لاش ضابطے کی کارروائی کے لیے سول اسپتال پہنچائی ، پولیس کا کہنا ہے کہ مقتول کی عمر 22 سال کے قریب ہے جبکہ اسے نامعلوم ملزمان نے اغوا کے بعد بہیمانہ تشدد کا نشانہ بنا کر سر اور سینے پر گولیاں مار کر ہلاک کیا ۔ عزیز آباد کے علاقے یاسین آباد شیل پمپ کے قریب نامعلوم ملزمان کی فائرنگ سے ایک شخص ہلاک ہوگیا۔