شیریں جناح کالونی اور ماڑی پور سے 17 افراد گرفتار 14 ہتھیار برآمد

شیریں جناح کا لونی میں ٹارگٹڈ آپریشن کے دوران گرفتار کیے گئے افرادکی رینجرزاہلکار تلاشی لے رہا ہے۔ فوٹو: ایکسپریس

---

پولیس و رینجرز نے شہر کے مختلف علاقوں میں جرائم پیشہ افراد کے خلاف کارروائیاں کرتے ہوئے 17 افراد کو گرفتار کرلیا۔

گرفتار افراد میں قتل ، اقدام قتل ، بھتہ خوری اور منشیات فروشی کے ملزمان بھی شامل ہیں ، تفصیلات کے مطابق رینجرز نے گزشتہ روز شیریں جناح کالونی میں آپریشن کیا ، اس دوران علاقے کے داخلی و خارجی راستوں پر بھاری نفری تعینات کردی گئی اور علاقے میں آمدورفت مکمل طور پر بند کرکے علاقے میں گھر گھر تلاشی کا سلسلہ شروع کیا گیا جس میں لیڈی سرچر بھی ہمراہ تھیں ، رینجرز نے آپریشن کے دوران مشتبہ افراد کو حراست میں لیا اور بڑی تعداد میں اسلحہ برآمد کرلیا۔

حراست میں لیے گئے افراد کو تفتیش کی غرض سے نامعلوم مقام پر منتقل کردیا گیا ، رینجرز کے ترجمان میجر سبطین نے ایکسپریس کو بتایا کہ رینجرز نے شیریں جناح کالونی میں کارروائی کرتے ہوئے پرویز خان ، سرتاج خان ، طفیل ، راشد ، شیر ولی ، جان محمد ،یعقوب اور سلیمان سمیت 9 افراد کو حراست میں لیا جن کے قبضے سے 14 ہتھیار برآمد کیے گئے، برآمد شدہ ہتھیاروں میں ایس ایم جی ، کلاشنکوف ، شارٹ گن ، مختلف اقسام کی رائفلیں ، ٹی ٹی پستول ، نائن ایم ایم اور متعدد کارتوس و رائونڈ شامل ہیں، حراست میں لیے گئے افراد میں بھتہ خور اور منشیات فروش بھی شامل ہیں۔



ذرائع نے ایکسپریس کو بتایا کہ رینجرز نے شاہ لطیف ٹائون سیکٹر 15-C میں بھی آپریشن کرتے ہوئے متعدد افراد کو حراست میں لیا ہے تاہم رینجرز ترجمان نے تصدیق سے گریز کیا ، لانڈھی پولیس نے کارروائی کرتے ہوئے 3 ملزمان محمد سلیم عرف انقلابی ، محمد بشیر عرف آصف بشیر اور محمد عبید ناصر کو گرفتار کرکے اسلحہ برآمد کرلیا ، پولیس کے مطابق ملزمان قتل ، اقدام قتل ، گھروں میں ڈکیتی اور اسٹریٹ کرائم سمیت متعدد وارداتوں میں پولیس کو مطلوب تھے۔

ملزمان نے عوامی کالونی ، زمان ٹائون ، کورنگی انڈسٹریل ایریا ، الفلاح اور شاہ فیصل کالونی میں متعدد وارداتوں کا اعتراف کیا ہے ، دریں اثنا اسپیشل انویسٹی گیشن یونٹ نے ماڑی پور میں کارروائی کرتے ہوئے 2 بھتہ خوروں رشید اور زبیر کو گرفتار کرکے 2 ٹی ٹی پستول برآمد کرلیے ، ایس آئی یو کے مطابق ملزمان تاجروں کو فون پر دھمکیاں دے کر لاکھوں روپے بھتہ وصول کرتے تھے ، ابتدائی تفتیش میں متعدد وارداتوں کا اعتراف کیا ہے ، مچھر کالونی میں پولیس نے کارروائی کرتے ہوئے 3 ملزمان کو گرفتار کرلیا۔