شدید گرمی کئی شہروں کا درجہ حرارت 50 ڈگری پر پہنچ گیا

لاڑکانہ کا پارہ 49، رحیم یار خان 48 ریکارڈ ، کل اور پرسوں کئی علاقوں میں بارش کا امکان

Numaindgan Express May 01, 2018

بدین کی ساحلی پٹی پر طوفانی ہوائوں سے تباہی،کئی گھروں کی چھتیں اڑ گئیں، بجلی بند۔ فوٹو: فائل

لاہور سمیت ملک کے بیشتر شہروں میں شدید گرمی پڑنے لگی، جیکب آباد اور شہید بینظیر آباد کا درجہ حرارت 50 ڈگری سینٹی گریڈ ہو گیا۔

محکمہ موسمیات کے مطابق بدھ اور جمعرات کے روز بالائی پنجاب، بالائی خیبرپختونخوا، فاٹا، اسلام آباد، گلگت بلتستان اور کشمیر میں تیز ہوائوں ، آندھی اور گرج چمک کے ساتھ بارش کا امکان ہے تاہم اگلے دو روز کے دوران جنوبی پنجاب اور سندھ کے بعض علاقوں میں گرمی کی شدت میں اضافے کا امکان ہے۔

منگل کے روز بھی ملک کے بیشتر علاقوں میں موسم گرم اور خشک رہے گا تاہم مالاکنڈ، ڈی آئی خان ڈویژن اور بالائی فاٹا میں چند مقامات پر تیز ہوائوں اورگرج چمک کیساتھ بارش کا امکان ہے۔

گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا، سوموار کے روز ریکارڈ کئے گئے گرم ترین مقامات کے درجہ حرارت کے مطابق جیکب آباد ، شہید بینظیر آباد 50، لاڑکانہ، سکھر ، پڈعیدن، موہنجوداڑو 49، دادو، روہڑی اور رحیم یار خان میں 48 ڈگری سینٹی گریڈ ریکارڈ کیا گیا۔

محکمہ موسمیات نے آئندہ تین روز کے دوران کراچی میں بھی گرم موسم کی پیشنگوئی کی ہے، شہر کا درجہ حرارت 35 سے 38 ڈگری سینٹی گریڈ تک رہنے کا امکان ہے۔