پی ایس ایل 4 کی افتتاحی تقریب پاکستان میں سجانے کی تجویز

فرنچائززکی تیسرے ایڈیشن میں امپائرنگ پر شدید تنقید، بہتری کا مطالبہ

Saleem Khaliq May 04, 2018

کرکٹرزکے معاوضوں میں اضافہ کریں (بورڈ) غیرملکی بھی ٹیکس دیں گے۔ فوٹو:فائل

ISLAMABAD: پی ایس ایل 4 کی افتتاحی تقریب سمیت ابتدائی میچز پاکستان میںکرانے کی تجویز سامنے آ گئی۔

پاکستان سپر لیگ کے حوالے سے گذشتہ روز لاہور میں ایک اجلاس منعقد ہوا ، جس میں پروجیکٹ ڈائریکٹر نائلہ بھٹی سمیت دیگر پی سی بی آفیشلز اور فرنچائزز کے نمائندے شریک ہوئے۔

ذرائع کے مطابق اس موقع پر شرکا کو بتایا گیا کہ پی ایس ایل فور کی افتتاحی تقریب سمیت ابتدائی میچز پاکستان میں کرانے کی تجویز زیرغورہے،لاہور، کراچی اور راولپنڈی میزبانی کریں گے۔

فرنچائزز نے پی ایس ایل تھری میں امپائرنگ کے معیار کو سخت تنقید کا نشانہ بنایا، ان کے مطابق میچز ٹی وی پر پوری دنیا میں دکھائے جا رہے تھے امپائرز کے غلط فیصلوں سے اچھا تاثر نہیں گیا، آئندہ سیزن میں بہتری لازمی ہے۔

پی سی بی کی جانب سے فرنچائزز سے کہا گیا کہ کھلاڑیوں کے معاوضوں میں اضافہ کیا جائے جنھوں نے تجویز پر غور کا یقین دلایا، یہ بات بھی سامنے آئی کہ آئندہ غیرملکی کھلاڑیوں کے معاوضوں سے بھی ٹیکس منہا کیا جائے گا۔

گزشتہ دونوں ایونٹس کے تجربات کو دیکھتے ہوئے فرنچائزز نے پی سی بی سے مطالبہ کیا کہ جو کھلاڑی پاکستان آنے کو تیار نہ ہوں انھیں ڈرافٹ میں شامل نہ کیا جائے، دورے پر آمادہ کرکٹرز کو بھی اضافی رقم نہ دی جائے بلکہ معاہدے میں شق شامل ہونی چاہیے کہ وہ پاکستان جائیں گے۔ اسی کے ساتھ ڈرافٹ رینڈم ہونے چاہئیں، پہلے سے باریاں طے کرنا مناسب نہیں ہے۔

علاوہ ازیں شرکا نے اسلام آباد یونائٹیڈ کو پی ایس ایل تھری کا ٹائٹل جیتنے پر مبارکباد بھی پیش کی۔