انتخابی معرکہ آرائی سیاسی جماعتوں نے مہم شروع کر دی

الیکشن کی تیاریوں کے سلسلے میں پیپلز سیکریٹریٹ کے سامنے چورنگی پر پیپلز پارٹی اورپاکستان کے پرچم لگائے گئے ہیں (فوٹو ایکسپریس)

---

عام انتخابات کے حوالے سے سیاسی و مذہبی جماعتوں کے قومی و صوبائی اسمبلی کے امیدواروں نے اپنی انتخابی مہم کا باقاعدہ آغاز کردیا ہے اور انتخابات کے حوالے سے شہر بھر میں انتخابی سرگرمیاں تیز کردی گئی ہیں مختلف سیاسی و مذہبی جماعتوں کے امیدواروں نے اپنے اپنے حلقہ انتخاب میں الیکشن کمیشن کی ہدایت کے مطابق پوسٹر ، پینافلیکس اور بینرز آویزاں کرنے کا سلسلہ شروع کردیا ہے۔

تفصیلات کے مطابق ریٹرنگ افسران کی جانب سے کراچی میں قومی اسمبلی کی20 اور سندھ اسمبلی کی42 نشستوں پر امیدواروں کی فہرست جاری ہونے کے بعد سیاسی و مذہبی جماعتوں اور آزاد امیدواروں نے ہفتہ کے روز سے اپنی باقاعدہ انتخابی مہم کا آغاز کردیا ہے اور شہر کے مختلف علاقوں میں ایم کیو ایم ، پیپلز پارٹی،جماعت اسلامی،تحریک انصاف ، مسلم لیگ (ن) ، جے یو پی ، جے یو آئی ، متحدہ دینی محاذ سمیت دیگر سیاسی و مذہبی جماعتوں کے امیدواروں اور آزاد امیدواروں نے اپنے انتخابی دفاتر قائم کرنا شروع کردیے ہیں۔

شہر کے لیاری، کیماڑی، کھارادر، اورنگی ٹائون، نیو کراچی، صدر ، ملیر، لیاقت آباد سمیت دیگر علاقوں میں مختلف سیاسی جماعتوں نے شاہراہوں اور علاقوں میں موجود عمارتوں پر پارٹی پرچم لگا دیے ہیں تاہم بیشتر امیدوار گھر گھر جاکر عوام سے رابطہ کرنے کو ترجیح دے رہے ہیں اور بعض حلقوں میں مختلف جماعتوں کے امیدواروں نے محدود پیمانے پر کارنرز میٹنگز کا انعقاد شروع کردیا ہے،کراچی میں امن و امان کی خراب صورتحال اور سیکیورٹی خدشات کے باعث امیدواروں کو اپنی انتخابی مہم چلانے میں دشواری کا سامنا ہے۔



ماضی کے برعکس11مئی کو ہونے والے انتخابات کے لیے روایتی گہما گہمی نہیں دیکھی جارہی،انتخابی امیدوار سوشل نیٹ ورک فیس بک اور موبائل ایس ایم ایس کے ذریعے بھی اپنی مہم چلا رہے ہیں،مختلف جماعتوں اور آزاد امیدواروں نے اپنی انتخابی مہم چلانے کے لیے بڑے پیمانے پر پوسٹرز، پمفلٹ، پینافلیکس اور پارٹی جھنڈے چھپوائے ہیں،سیاسی جماعتوں کے امیدواروں کا کہنا ہے کہ کراچی میں امان و امان کی صورتحال بہتر رہی تو بھرپور انداز میں انتخابی مہم چلائیں گے۔

دوسری جانب ایم کیو ایم کے قائد نے ایک بڑے جلسہ عام سے ٹیلی فونک خطاب کرتے ہوئے انتخابی مہم کا آغاز کیا جبکہ پیپلز پارٹی کراچی ڈویژن کے عہدیداروں قاسم بلوچ اور دیگر نے پریس کانفرنس کے ذریعے اپنی انتخابی مہم شروع کردی ہے،مسلم لیگ (ف) کے رہنما سردار رحیم نے اپنے انتخابی حلقوں میں پوسٹر ، بینرز اور پینافلیکس لگا کر انتخابی مہم کا آغاز کیا۔

بعدازاں سردار رحیم نے بتایا کہ ان کے مخالفین نے ان کے بینرز اتارنے اور پھاڑنے شروع کردیے ہیں،مسلم لیگ (ن) کے رہنما نہال ہاشمی نے کارنر میٹنگ سے خطاب کرکے انتخابی مہم کا آغاز کیا،جماعت اسلامی کے نعمت اللہ ایڈووکیٹ نے کارنر میٹنگ سے انتخابی مہم شروع کردی جبکہ تحریک انصاف نے ریلی کی صورت میں اپنی انتخابی مہم کا آغاز کیاہے۔