مفت بجلی واپڈا ملازمین کا استحقاق ہےعبداللطیف نظامانی

اتحاد اور سچی لگن سے ہی منز ل ملتی ہے، افطار پارٹی سے محمد اقبال کا بھی خطاب

---

پاکستان واپڈا ہائیڈرو الیکٹرک لیبر یونین سی بی اے کے مرکزی صدر عبداللطیف نظامانی نے کہا ہے کہ یونین اتحاد اور جدوجہد کا نام ہے جدوجہد سچی اور لگن حقیقی ہو تو راستے کی دشواریوں کے باوجود منزل مل ہی جاتی ہے جس کی تازہ ترین مثال یہ ہے کہ واپڈا کی کچھ کمپنیوں نے بونس اعزازیہ منظور نہیں کیا تھا تاہم یونین کی جدوجہد کے نتیجے میں این ٹی ڈی سی ایل کے لیے واپڈا اتھارٹی نے ایک ماہ کے برابر اعزازیہ دینے کے احکامات جاری کر دیے۔

ڈویژنل چیئرمین قاسم آباد محمد یوسف خان کی افطار پارٹی میں خطاب کرتے ہوئے انھوں نے کہا کہ حکومت واپڈا ملازمین کو محدود مفت بجلی کی سہولت ختم کرنے کی پلاننگ سے باز رہے، یہ ملازمین کا استحقاق ہے جو 1973میں یونین نے بڑی جدوجہد کر کے منظور کرایا تھا۔ حکومت پہلے وزراء، مشیران، سینٹیرز، اراکین اسمبلی، بیورو کریٹس اور ٹیکس چوروں سے سہولتیں اور مراعات واپس لے تاکہ غریب عوام جو ٹیکسوں کے بوجھ تلے دب چکے ہیں ان کی کسی حد تک اشک شوئی ہو سکے اور جو لوگ خودکشی کر رہے ہیں ان میں زندہ رہنے کی امید جاگے۔

صوبائی جنرل سیکرٹری محمد اقبال قائم خانی نے کہا کہ ملک گیر ریلی کے اگلے ہی روز این ٹی ڈی سی ایل کے ملازمین کے لیے انتظامیہ کی جانب سے اعزازیہ کا اعلان، عید سے قبل نوید عید ہے۔ تقریب میں ملک سلطان علی، اعظم خان، فاروق چینگیزی، محمد حنیف خان، اسد اللہ، وحید پٹھان، راو سعید احمد، اقبال خان، اشرف انصاری، حمید شیخ، روف صدیقی، رفیع عالم، ارشد نقوی، سراج بیگ، حافظ عبدالکریم کے علاوہ واپڈا افسران اور اسٹاف نے بڑی تعداد میں شرکت کی۔