قائدآباد بم دھماکے میں جاں بحق 6 افراد کی تدفین

جنازے اٹھنے پر علاقے میں کہرام ،ایک ہی علاقے کے 11 افراد کی ہلاکت کے باعث فضا سوگوار،لوگ اپنے پیاروں کے جنازوں سے لپٹ کرروتے رہے

---

KARACHI: قائد آباد بم دھماکے میں جاں بحق ہونے والے 6 افراد کومقامی قبرستان میں سپرد خاک کردیا گیا۔

جاں بحق ہونے والے 3 افراد کی میتیں تدفین کے لیے آبائی علاقوں کو روانہ کردی گئیں ،دھماکے میں جاں بحق ہونے والے2 افراد کی تاحال شناخت نہیں ہو سکی ،6 افراد کے مختلف علاقوں سے جنازے اٹھنے پر کہرام مچ گیا لوگ اپنے پیاروں کے جنازوں سے لپٹ کر دہاڑیں مار مار کر روتے رہے ، اس موقع پر علاقے کی فضا سوگوار رہی،تفصیلات کے مطابق قائد آباد میں ہفتے کی صبح عوامی نیشنل پارٹی کے مرکزی دفتر کے باہر بم دھماکے میں جاں بحق ہونیوالے عوامی نیشنل پارٹی کے علاقائی عہدیدار کے بیٹے حافظ اسد علی خان ولد حاجی شوکت ، غلام حسین ولد سرور خان ، خان محمد ولد گلباز خان ، ماجد ولد علی حیدر اور عمر اﷲ ولد گلزار خان کی نماز جنازہ مختلف اوقات میں لانڈھی کے علاقے جانباز گراؤنڈ کے قریب ہادی مل میں ادا کی گئی۔



نماز جنازہ میں مقتولین کے اہلخانہ عزیز و اقارب ، علاقہ مکینوں کی بڑی تعداد کے علاوہ عوامی نیشنل پارٹی کے عہدیداران و کارکنوں نے شرکت کی ،بعدازاں میتیں ظفر ٹاؤن میں واقع قبرستان میں سپرد خاک کردی گئیں ، دھماکے میں جاں بحق ہونے والے3 افراد محمد طارق ولد محمود خان کی میت آبائی علاقے ضلع ہزارہ ، نواب خان ولد شیر خان کی میت وزیرستان اور گوہر زمان ولد ترزمان کی میت لکی مروت روانہ کردی گئیں ، دھماکے میں جاں بحق ہونے والے کمسن بچے فرحان ولد محمد رمضان کی نماز جنازہ ہفتے کو ہی ہادی مل میں ادا کردی گئی تھی جبکہ اسے ظفر ٹاؤن قبرستان میں سپردخاک کردیا گیا تھا۔

جاں بحق ہونے والوں کے جنازے اٹھنے پر علاقے میں کہرام مچ گیا لوگ اپنے پیاروں کے جنازوں سے لپٹ کر روتے رہے ،اس موقع پر ہر آنکھ اشکبار تھی ، ایک ہی علاقے کے 11 افراد کی ہلاکت کے باعث فضا سوگوار تھی اور لوگوں نے رضا کارانہ طور پر علاقے میں دکانیں اور دیگر کاروبار بند رکھا ، ایس ایچ او قائد آباد شبیر حسین نے ایکسپریس کو بتایا کہ دھماکے میں جاں بحق ہونے والے2 افراد کی تاحال شناخت نہیں کی جا سکی ، واضح رہے کہ قائد آباد داؤد چارلی پر عوامی نیشنل پارٹی کے مرکزی دفتر کے قریب رکشے میںکیے جانے والے دھماکے میں11 افراد ہلاک جبکہ 33 افراد زخمی ہوگئے تھے ۔