نوازشریف کی سندھ میں ہڑتال کی حمایت افسوسناک ہے بلاول ہاؤس

طلبا کے امتحانات کے موقع پرہڑتال کی حمایت کرنے پرجتنا افسوس کیا جائے کم ہے، ترجمان ۔ فوٹو: ایکسپریس

---

بلاول ہاؤس کے ترجمان اعجاز درانی نے ن لیگ کے سربراہ نواز شریف کی جانب سے سندھ میں 10 جماعتی اتحاد کی ہڑتال کی حمایت پرسخت افسوس اور دکھ کا اظہارکیا ہے۔

ترجمان نے کہا کہ نواز شریف نے اپنے عہدے کا حلف اٹھانے سے قبل ہی سندھ میں ملک دشمن عناصر کی حمایت کرکے جنرل ضیا کی روح کو خراج عقیدت پیش کرنے کی کوشش کی ہے۔انھوں نے کہا کہ ایک جانب جنرل ضیا کے فرزند اعلی خودکونوجوانوں کا لیڈر ہونے کا دعوے کر رہے ہیں اور دوسری جانب وہ عین اس وقت ہڑتال کی حمایت کر رہے ہیں۔



جب سندھ کے طلبا و طالبات مختلف تعلیمی اداروں میں اپنے امتحانات دیں گے۔ صوبہ سندھ وفاق کا قلعہ ہے اور پیپلزپارٹی وفاق کی علامت ہے۔ جنرل ضیا نے بھی سندھ کے خلاف سازش کرنے والوں کوکیک کے تحفے بھجوائے تھے اورآج میاں برادران ایک مرتبہ پھر جنرل ضیا کے نقش قدم پرچلتے ہوئے ان کی حمایت کر کے اس تاریخی حقیقت کو واضح کر رہے ہیں کہ ان کے جسموں میں اب تک جنرل ضیا کی روح بھٹک رہی ہے۔ جس پرجتنا بھی افسوس کیاجائے کم ہے۔