پادری کو رہا نہ کرنے پر امریکا کی ترکی پر مزید پابندیاں عائد کرنے کی دھمکی

پادری کو رہا نہ کرنے پر امریکا ترکی پر پہلے ہی کئی پابندیاں عائد کرچکا ہے (فوٹو : فائل)

---

امریکا نے اپنے پادری کو رہا نہ کرنے پر ترکی کو مزید پابندیوں کی دھمکی دے دی۔

امریکی صدر ڈونلڈ ٹرمپ نے اپنے ٹوئٹ میں ایک بار پھر دھمکی دیتے ہوئے ترکی کو خبردار کیا ہے کہ امریکی پادری کو رہا نہ کیا گیا تو ترکی پر مزید پابندیاں عائد کر دی جائیں گی۔

امریکی صدر ڈونلڈ ٹرمپ نے کہا ہے کہ ترکی برسوں تک امریکا سے فائدے حاصل کرتا رہا لیکن اب امریکی پادری اینڈریو برونسن کو بلاجواز طور پر یرغمال بنا رکھا ہے جس سے دونوں ممالک کے درمیان کشیدگی میں اضافہ ہوتا جا رہا ہے۔

Turkey has taken advantage of the United States for many years. They are now holding our wonderful Christian Pastor, who I must now ask to represent our Country as a great patriot hostage. We will pay nothing for the release of an innocent man, but we are cutting back on Turkey!

— Donald J. Trump (@realDonaldTrump) August 16, 2018

امریکی صدر کا مزید کہنا تھا کہ ترکی میں گرفتار بے گناہ امریکی پادری کے لیے امریکا کوئی قیمت ادا نہیں کرے گا البتہ ترکی کو اقتصادی پابندیوں کی وجہ سے مزید خمیازہ ضرور بھگتنا پڑے گا جس کے لیے انقرہ تیار رہے۔

امریکی پابندیوں کی وجہ سے ترک کرنسی لیرا کی قدر کو پہلے ہی مسلسل گراوٹ کا سامنا ہے جس سے ترکی معیشت کو ناقابل تلافی نقصان پہنچ رہا ہے۔ دوسری جانب ترکی نے امریکی مصنوعات کا بائیکاٹ کرتے ہوئے تجارتی لین دین کے لیے امریکی ڈالر کے بجائے مقامی کرنسی استعمال کرنے کا اعلان کیا ہے۔

یہ خبر بھی پڑھیں : امریکی ڈالر کی حاکمیت کے دن گنے جا چکے ہیں، روسی وزیرخارجہ

واضح رہے کہ ترکی میں مقیم امریکی پادری اینڈریو برونسن کو 2016ء میں ناکام فوجی بغاوت میں معاونت کے جرم میں حراست میں لیا گیا تھا اور حال ہی میں ترک عدالت نے انہیں جیل سے گھر منتقل کر کے نظربند رکھنے کے احکامات جاری کیے تھے جس پر امریکا نے شدید مخالفت کرتے ہوئے پادری کی رہائی کا مطالبہ کررکھا ہے۔