سندھ اسمبلی میں اپوزیشن لیڈر کیلئے پی ٹی آئی رہنما آمنے سامنے آگئے

اپوزیشن لیڈر کے لئے ووٹنگ میں فردوس شمیم نقوی کو 15 جب کہ حلیم عادل شیخ کو 13 ووٹ ملے فوٹو:فائل

---

سندھ اسمبلی میں اپوزیشن لیڈر کیلئے پی ٹی آئی کے رہنما حلیم عادل شیخ اور فردوس شمیم نقوی آمنے سامنے آگئے۔

تحریک انصاف ملک کے سب سے بڑے شہر کراچی میں اختلافات کا شکار ہوگئی اور سندھ اسمبلی میں اپوزیشن لیڈر کے لئے پی ٹی آئی کے دو رہنما آمنے سامنے آگئے۔

ذرائع کے مطابق صوبائی اسمبلی میں اپوزیشن لیڈر کے لئے حلیم عادل شیخ اور فردوس شمیم نقوی میں مقابلہ ہوا۔ تحریک انصاف کے ایک رہنما کے گھر میں اراکین صوبائی اسمبلی جمع ہوئے اور قائد حزب اختلاف کے لئے باقاعدہ ووٹنگ ہوئی جس میں 29 اراکین نے حصہ لیا۔

ذرائع کا کہنا ہے کہ انتخاب میں فردوس شمیم نقوی کو 15 جب کہ حلیم عادل شیخ کو 13 ووٹ ملے اور ایک ووٹ خالی کاسٹ کیا گیا۔ انٹرا پارٹی الیکشن کے چیف ثمر علی خان انتخابی نتائج عمران خان کو ارسال کریں گے اور چیئرمین پی ٹی آئی ہی سندھ کے اپوزیشن لیڈر کا باضابطہ اعلان کریں گے۔