سندھ حکومت کا ڈاکٹرز کو بغیر ٹیسٹ کے بھرتی کرنے کا فیصلہ

ہم وقت بچانا اور عوام کو فوری ریلیف دینا چاہتے ہیں، سندھ کابینہ اس اہم فیصلے کی منظوری دے چکی ہے، مشیر اطلاعات مرتضیٰ وہاب۔ فوٹو: فائل

---

سندھ حکومت نے ڈاکٹرز کو بغیر ٹیسٹ کے بھرتی کرنے کا فیصلہ کیا ہے۔

صوبائی مشیر اطلاعات، قانون و اینٹی کرپشن سندھ بیرسٹر مرتضیٰ وہاب نے گزشتہ روز میڈیا سے گفتگو میں کہا کہ محکمہ صحت سندھ میں ڈاکٹروں کی قلت کو دور کرنے کیلیے سندھ حکومت نے بڑا فیصلہ کر لیا ہے، کمی پوری کرنے کیلیے ڈاکٹروں کو صرف انٹرویوز کی بنیاد پر بھرتی کیا جائیگا۔

بیرسٹر مرتضیٰ وہاب کا مزید کہنا تھا کہ بغیر تحریری امتحان کے صوبے میں ڈیڑھ ہزار سے زائد ڈاکٹرز بھرتی کیے جائیں گے۔ پبلک سروس کمیشن کے ذریعے امتحان لینا طویل مرحلہ ہے۔ ہم وقت بچانا اور عوام الناس کو فوری ریلیف دینا چاہتے ہیں جس کے لیے یہ فیصلہ کیا گیا ہے۔

مرتضیٰ وہاب نے بتایا کہ سندھ کابینہ اس اہم فیصلے کی منظوری دے چکی ہے۔ ابتدائی طور پر ماہر اور ایم بی بی ایس ڈاکٹروں کو کنٹریکٹ کی بنیاد پر ان کی تعلیمی اسناد کی جانچ پڑتال کے بعد بھرتی کیا جائے گا جب کہ بھرتی کیے گئے ڈاکٹروں کو بعد میں سندھ پبلک سروس کمیشن کا امتحان پاس کرنا ضروری ہوگا۔ ڈاکٹرز کی بھرتی فوری طور پر شروع کی جائے گی۔