بھارتی فضائیہ کے 2 طیارے آپس میں ٹکرا کر تباہ پائلٹ ہلاک

دونوں طیاروں کو حال ہی میں اپ گریڈ کیا گیا تھا اور وہ کل ہونے والے انڈیا فضائی شو کے لیے پریکٹس کر رہے تھے

ویب ڈیسک February 19, 2019

دونوں طیارے کل ہونے والے انڈیا ایئرو شو کے لیے پریکٹس کررہے تھے۔ فوٹو : فائل

بھارتی فضائیہ کے 2 طیارے دوران پرواز فضاء میں آپس میں ہی ٹکرا گئے جس کے نتیجے میں ایک پائلٹ ہلاک اور دو زخمی ہوگئے۔

بین الاقوامی خبر رساں ادارے کے مطابق بھارتی شہر بنگلورو میں 2 'سوریا کرن ایئرکرافٹ' نیتی میناکشی انجینئرنگ کالج کے نزدیک آپس میں ٹکرا کر تباہ ہوگئے، حادثے میں 3 پائلٹس شدید زخمی ہوگئے جن میں سے ایک نے اسپتال جاتے ہوئے دم توڑ دیا۔

پولیس کا کہنا ہے کہ دونوں زخمی پائلٹس کی حالت اب خطرے سے باہر ہے، ایک شہری بھی زخمی ہے جسے طبی امداد فراہم کی جارہی ہے۔ طیارے حادثے کی وجوہات جاننے کے لیے تفتیشی کمیٹی تشکیل دے دی گئی ہے۔

وزیر دفاع نرملہ ستھارامن نے طیاروں کے تباہ ہونے کی تصدیق کرتے ہوئے میڈیا کو بتایا کہ وہ افسوسناک واقعے سے آگاہ ہیں تاہم انہوں نے واقعے کی تفصیلات بتانے سے گریز کیا۔

یہ طیارے 'ایئرو انڈیا شو' کے دوران پیشہ وارانہ کرتب کا مظاہرہ کرنے کے لیے مشق کررہے تھے، ایئرکرافٹ سوریا کرن ایروبیٹک ٹیم کا حصہ ہیں جو فضاء میں دم بخود کر دینے والے نظاروں کا مظاہرہ کرنے میں مہارت رکھتے ہیں۔

حال ہی میں ان سوریا کرن ایئرکرافٹس کو اپ گریڈ کرتے ہوئے Hawks میں تبدیل کردیا گیا تھا اور اس تبدیلی کے بعد ان طیاروں نے گزشتہ روز بھی کامیاب پریکٹس کی تھی تاہم آج حادثے کا شکار ہوگئے۔