ترقیاتی کاموں کی آڑمیں کروڑوں روپے بٹورے جارہے ہیںخالد عطاری

حکام نے ترقیاتی پیکیج کے نام پرکرپشن کانوٹس نہیںلیا توعدالت جائینگے،رہنماسنی تحریک. فوٹو: ایکسپرس

---

پاکستان سنی تحریک کے صوبائی رہنما خالد حسن عطاری نے الزام عاید کیا ہے کہ حیدرآبادڈیولپمنٹ پیکج کے تحت جاری اسکیموں میں ناقص میٹریل استعمال کرکے غیر معیاری کام کیا جارہا ہے جبکہ ترقیاتی کاموں میں حیلے بہانے اورسست روی کی جارہی ہے۔

بیان میں انھوں نے کہاکہ ترقیاتی کاموں کی آڑ میں کروڑوں روپے بٹورے جارہے ہیں جبکہ افسران کمیشن حاصل کرنے کی باگ دوڑ میں لگے ہوئے ہیں، آٹوبھان روڈ، جامشورو روڈ، قاسم آباد میں جو سیوریج لائنیں ڈالی جارہی ہیں ان میں انتہائی ناقص میٹریل استعمال کیاجارہا ہے ۔

انھوں نے کہا کہ منظور نظر ٹھیکیداروں نے حیدرآبادکے نکاسی آب کے نظام کو ریلوے اور واپڈا کی طرح تباہی کے دہانے پر کھڑا کردیا ہے، جس کی وجہ یہ ہے کہ حیدرآباد ڈیویلپمنٹ پروگرام میں منظور نظر سفارشی اور رشوت خورافراد کو لگایا گیا ہے جن کی توجہ ترقیاتی کاموںپر کم اور مال بٹورنے پر زیادہ ہے جبکہ پراجیکٹ ڈائریکٹر اپنے دفتر سے باہر نکلنے کو تیار تک نہیں ہیں،حیدرآباد کو ترقی یافتہ بنانے کے بجائے کھنڈرات میں تبدیل کیا جا رہا ہے، انھوں نے کہا کہ اگر حکام بالا نے ترقیاتی پیکیج کے نام پر کروڑوں روپے کی کرپشن کا نوٹس نہیں لیا تو پاکستان سنی تحریک عدلیہ کا دروازہ کھٹکھٹانے میںآزاد ہوگی۔