جاپان کی جانب سے آنکھوں کے اسپتال کے لیے 102 ملین روپے کی امداد

جاپانی قونصل جنرل آکیرا اوچی اور ایل آر بی ٹی کے چیئرمین خواجہ ظفرحسین و دیگر کا معاہدے پر دستخط کے بعد گروپ ۔ فوٹو : ایکسپریس

---

KARACHI: حکومت جاپان کی طرف سے معاونتی پروگرام برائے انسانی تحفظ (جی جی پی) کے تحت لیٹون رحمت اللہ بینولینٹ ٹرسٹ (ایل آر بی ٹی) کے آنکھوں کی بہتری کے اسپتال کے منصوبے کیلیے دی جانے والی امداد بڑھاکر10.2 ملین روپے کردی گئی ۔

کراچی میں اس منصوبے کے معاہدے پر جاپانی قونصل جنرل آکیرا اوچی اور ایل آر بی ٹی کے چیئرمین خواجہ ظفرحسین نے دستخط کیے، یہ امداد ضلع بدین میں ایل آر بی ٹی کے آنکھوں کے اسپتال کی عمارت میں نئے آپریشن تھیٹر کیلیے استعمال کی جائے گی، جاپانی قونصل خانہ پرامید ہے کہ اس منصوبے سے علاج کرانے کی سکت نہ رکھنے والے لوگوں کو مناسب اور مفت علاج کی سہولت دستیاب ہوگی۔

جاپان کے لوگوں کا یہ جذبہ خیرسگالی پاکستان اور جاپان کے درمیان دوستانہ تعلقات کو مزید مضبوط کرے گا، دستخط کی تقریب کے موقع پر قونصل جنرل آکیرا اوچی نے امید کا اظہار کیا کہ اس عمارت میں ایک بڑا اور محفوظ آپریشن تھیٹر ہوگا اور ایل آر بی ٹی زیادہ مریضوں کیلیے مطلوبہ سرجری مہیا کرے گا۔