یونی لیور پاکستان اور سماجی ادارہ ڈاکٹرز کے درمیان معاہدہ طے پا گیا

پروگرام کے ذریعے فرنٹ لائن ہیلتھ ورکرز پاکستان کے 4 ہزارسے زائد دیہات میں عدم توجہی کی شکار برادریوں کو متحرک کریں گے۔ فوٹو: فائل

---

یونی لیور پاکستان، ڈپارٹمنٹ فار انٹرنیشنل ڈیولپمنٹ اور سماجی ادارہ ڈاکٹرز کے درمیان معاہدہ طے پاگیا۔

کراچی کے مقامی ہوٹل میں یونی لیور پاکستان نے سماجی ادارہ ڈاکٹرز اور برطانیہ کا ادارہ ڈپارٹمنٹ فار انٹرنیشنل ڈیولپمنٹ (ڈی ایف آئی ڈی) کے ساتھ مفاہتی یادداشت پر دستخط کردیے جس کے تحت ''سکھ سہیلی'' کے نام سے شروع ہونے والا پروجیکٹ 2019 میں پاکستان کے دیہی علاقوں کی 10 لاکھ خواتین کو صحت اور بہبود کی اعلیٰ معیاری خدمات فراہم کرنے کے لیے یونی لیور کے ریٹیل پروگرام کی وسیع رسائی کو استعمال کرے گا۔

اس پروگرام کے ذریعے فرنٹ لائن ہیلتھ ورکرز پاکستان کے 4 ہزار سے زائد دیہات میں عدم توجہی کی شکار برادریوں کو متحرک کریں گے اور انھیں ٹیلی میڈیسن،ایچ ڈی وڈیو کنسلٹیشن اور ڈیجیٹل تشخیصی ٹولز کے ذریعے تعلیم یافتہ خواتین ڈاکٹروں سے ملوا کر ان کے صحت کے مسائل حل کیے جائیں گے۔

اس موقع پر یونی لیور پاکستان کی چیئرپرسن اور سی ای او شازیہ سید کا کہنا تھا کہ ہمیں ان آبادیوں کو جن میں ہم کام کرتے ہیں مثبت طریقے سے فائدہ پہنچانے کے لیے یونی لیور کے بزنس کی رسائی کو استعمال کرنا چاہیے۔