ایمرجنگ ٹیمز کپ بھارت نے نیپال کو 84 رنز سے قابو کرلیا

سوریا کمار کی آل رائونڈ پرفارمنس، سری لنکا نے یواے ای کو 30 رنز سے مات دیدی، جیا سوریا نے 101 کی اننگز کھیلی۔ فوٹو: اے ایف پی / فائل

---

اے سی سی ایمرجنگ ٹیمز کپ میں بھارت نے نیپال کو84 رنز سے قابو کر لیا، مسلسل دوسری فتح سے 4 پوائنٹس کے ساتھ ٹیم کی پوزیشن مضبوط ہوگئی، سری لنکا نے یواے ای کو 30 رنز سے مات دی، شیہان جیاسوریا نے 101 کی زبردست اننگز کھیلی۔

تفصیلات کے مطابق کپتان سوریا کمار یادیو نے آل رائونڈ پرفارمنس سے نیپال کیخلاف بھارتی جیت میں کلیدی کردار ادا کیا، انھیں میچ کا بہترین کھلاڑی بھی قرار دیاگیا، 269 کے ہدف کا تعاقب کرنے والی نیپالی ٹیم کو لیفٹ آرم اسپنر اکشر پٹیل اور پیسر سندیپ شرما کیخلاف رنز بنانے میں خاصی دشواری کا سامنا رہا،ابتدا میں بولرز انکت باونے، جسپریت بروما اور سندیپ ویئریر کی پرفارمنس نمایاں رہی، اس کے بعد کپتان سوریا کمار اور اشوک منیریا نے بھی درمیانی اوورز میں حریف بیٹسمینوں کو کسی بھی موقع پر کھل کر کھیلنے کا موقع نہیں دیا۔

ٹیم کو پہلی کامیابی کپتان یادیو نے اننگز کے 18ویں اوور میں دلائی،اوپنر انیل منڈل (19) انھیں ریٹرن کیچ دے کر پویلین چلتے بنے، رائٹ آرم میڈیم پیسر بروما نے اپنی پہلی ہی گیند پر سبھاش کھاکوریل (29) کو شکار کرلیا، اس کے نتیجے میں نیپالی ٹیم کا اسکور یکدم 49-2 ہوگیا، باونے اور سندیپ نے بھی حریف بیٹسمینوں کا جینا دوبھر کیے رکھا، دونوں نے اپنے ابتدائی اسپیل میں2،2 وکٹیں لے کر نیپال کی ہمت کو توڑدیا، کیرالہ سے تعلق رکھنے والے سندیپ نے اپنے پہلے ہی اوور میں پارس کھاڈکا (12) کو قابو کیا جس کے بعد ٹیم کا اسکور32 اوورز میں6وکٹ پر 88 رنز ہوگیا۔



نمبر9 پر بیٹنگ کے لیے آنے والے ساگر پون نے61 گیندوں پر 52 رنز ناٹ آئوٹ بناکر کچھ مزاحمت کی لیکن ٹیم مقررہ اوورز میں 8 وکٹ پر 184 تک محدود رہی، اس سے قبل بھارت نے مقررہ 50 اوورز میں 268 کا مجموعہ ترتیب دیا، لوکیش راہول (88) اور انکمڈ چند(61) نے 118 رنز کا عمدہ آغاز فراہم کرکے بڑے اسکور کی بنیاد ڈالی، بسنت ریگمی نے تین گیندوں پر 2 وکٹیں لے کر بلوشرٹس پر ضرب لگائی، انھوں نے راہول اور جونیجا کو پویلین چلتا کرتے ہوئے ٹیم کا اسکور36.5 اوورز میں161-3 کیا،کپتان سوریا کمار یادیواور باونے نے چوتھی وکٹ کیلیے71 گیندوں پر 90 رنز کی شراکت سے بھارت کو 250 کا ہندسہ عبور کرایا۔

کپتان سوریا کمار 65 اور باونے 25 رنز بناکر میدان بدر ہوئے، بسنت ریگمی نے 3 کھلاڑیوں کو پویلین چلتا کیا۔دوسرے میچ میں سری لنکا نے یواے ای کو30 رنز سے قابو کرلیا،فاتح ٹیم نے 8 وکٹ پر 235 کا مجموعہ ترتیب دیا، شیہان جیاسوریا نے 101 رنز بنانے کیلیے 121 گیندوں کا سامنا کیا، ادارا جیاسندرا 38 اور دھنوشکا گوناتھیلیکا 23 رنز کے ساتھ نمایاں رہے، ناصر عزیز نے عمدہ بولنگ کا سلسلہ جاری رکھتے ہوئے 39 رنز کے بدلے3 وکٹوں کا سودا کیا، انھوں نے ابتدائی میچ میں سنگاپور کیخلاف بھی چار کھلاڑیوں کو آئوٹ کیا تھا، متحدہ عرب امارات کی ٹیم 9 وکٹ گنواکر 205 رنز ہی جوڑ پائی، ثاقب علی نے سب سے زیادہ 71 رنز بنائے، شیامن انور نے 53 رنز اسکور کیے، لاہیروجیارتنے نے 3 کھلاڑیوں کو پویلین چلتا کیا۔